ՀՀԿ խմբակցության ղեկավարը պաշտպանեց Շմայսի վարքագիծը

Խորհրդարանական ճեպազրույցների ժամանակ լրագրողները Առաքել Մովսիսյանի վարքագծի վերաբերյալ հարց ուղղեցին ԱԺ ՀՀԿ խմբակցության ղեկավար Վահրամ Բաղդասարյանին` փորձե՞լ են, արդյոք, սաստել Առաքել Մովսիսյանին:

Հիշեցնենք, որ Նիկոլ Փաշինյանի և Հեղինե Բիշարյանի ելույթների ժամանակ Շմայսը միջամտում էր տեղից, բղավում և լեզվակռվի մեջ մտնում պատգամավորների հետ:

Վահրամ Բաղդասարյանը, փորձելով պաշտպանել Առաքել Մովսիսյանին, կարծիք հայտնեց, որ կարևոր չէ` պատգամավորը տեղից է հակադարձում, թե` ամբիոնից, որովհետև եթե ամբիոնից անպարկեշտ հայտարարություններ են հնչում, անձնական դաշտ են մտնում, շեղվելով բուն նյութից, ապա դա դատապարտելի է` անկախ այն բանից` հանրապետական է, թե` ընդդիմադիր:

Վահրամ Բաղդասարյանը զարմանում է, թե ինչ է կատարվում, երբ որոշ ընդդիմադիր պատգամավորներ մոտենում են ԱԺ ամբիոնին, որովհետև նրանք սկսում են վիրավորել, այլ ոչ թե առողջ քննադատություն անել:

Մեր այն հարցին` այդ ո՞ր ընդդիմադիրն է անձնական վիրավորանքներ հասցրել ԱԺ ամբիոնից, մասնավորապես` կառավարության ծրագրի քննարկման ժամանակ, նա այդպես էլ անուններ և փաստեր չներկայացրեց` ասելով, որ նման դեպքեր եղել են:

Բաղդասարյանի խոսքով` հանրապետականը, լինելով ուժեղ և լինելով մեծամասնություն, երբեք առաջինը չի հրահրում վեճեր, այլ կողմնակից է կոնստրուկտիվ բանավեճի:  «Եթե առողջ քննադատություն ենք լսում, դա մեզ զգոն է պահում, բայց երբ հնչում են հայհոյանքներ, անձնական վիրավորանքներ, մենք դրանց կարող ենք հեգնանքով պատասխանել»,- ասաց նա: