Մարզահամերգային համալիրը աճուրդի է հանված

Կարեն Դեմիրճյանի անվան մարզահամերգային համալիրը աճուրդի է հանված: Yerkir.am-ը Դատական ակտերի հարկադիր կատարման ծառայության համապատասխան կայքից տեղեկանում է, որ երեկ կեսօրին «Ծիծեռնակաբերդում գտնվող մարզահամերգային համալիրը» աճուրդով վաճառքի է հանվել:

Համալիրի մեկնարկային գինը 19 350 000 000 դրամ է, դեռևս առաջարկներ չեն եղել: Աճուրդի  վերջնաժամկետը մինչև մայիսի 29-ը` ժամը 13:03 է:

Հիշեցնենք, որ դեռևս 2008 թվականին համալիրը սեփականաշնորհվել է «ԲԱՄՕ Մետալ» ընկերության սեփականատեր, Իրաքում ՀՀ արտակարգ և լիազոր դեսպան Մուրադ Մուրադյանի և նրա եղբայրների կողմից: Դեռևս այն ժամանակ եղբայրները խոստացել էին, որ մինչև 10 միլիոն դրամի ներդրում են անելու, սակայն այդպես էլ դա չարվեց: Խոսակցություններ եղան, որ եղբայրների միջև տարաձայնություններ կան:

Համերգների կազմակերպմամբ զբաղվող պրոդյուսերական կազմակերպությունները նույնիսկ խոսում էին այն մասին, որ համալիրի սեփականատերերը մի քանի միլիոն դրամի պարտք ունեն իրենց: Համալիրի ղեկավարության դեմ դատական գործեր էին սկսել նաև նախկին աշխատակիցները, որոնք պնդում էին, որ իրենց աշխատավարձերը չեն վճարել: