Համալիրը կրկին աճուրդի կհանվի

Աճուրդի հանված` Կարեն Դեմիրճյանի անվան մարզահամերգային համալիրը այդպես էլ գնորդ չի ունեցել մինչև մայիսի 29-ը` ժամը 13:03-ը: Այդ իսկ պատճառով այն երեք աշխատանքային օրից կրկին աճուրդի կհանվի: Այս մասին Yerkir.am-ին հայտնեց Դատական ակտերի հարկադիր կատարման (ԴԱՀԿ) ծառայության մամուլի պատասխանտու Ռիմա Եգանյանը:

Նա նշեց, որ  կրկնակի աճուրդը կազմակերպվելու է «Հրապարակային սակարկությունների մասին» ՀՀ օրենքի 35,4 հոդվածով սահմանված կարգով: Համաձայն այս հոդվածի` յուրաքանչյուր չկայացած աճուրդից հետո` երրորդ աշխատանքային օրը, գույքը դրվում է աճուրդի` նախորդ աճուրդի մեկնարկային գնից 10 տոկոս իջեցված գնով:

Նշենք նաև, որ օրեր առաջ տեղեկություն էր հրապարակվել, համաձայն որի` համալիրի աճուրդը կատարվել է մի շարք օրենքների խախտումներով, ինչպեսև այն չի գնահատվել` որպես պատմամշակութային արժեք: Սակայն Ռիմա Եգանյանը հերքեց դա:

«ԴԱՀԿ ծառայության գործողությունները օրինական են և իրավաչափ: Եթե, պարտապանի կարծիքով, տեղի է ունեցել որևէ օրենքի խախտում, ապա ճիշտ կլինի մատնանշել այն օրենքները և հոդվածները, որոնք, ըստ իրենց, խախտվել են»,- ասաց նա: