Մարզահամերգային համալիրը վաճառելու մասին որոշում կայացվեց

Կառավարության այսօրվա նիստում հավանության արժանացավ ՀՀ Պաշտպանության նախարարության Կարեն Դեմիճյանի անվան մարզահամերգային համալիրին ամրացված և ՀՀ սեփականությունը հանդիսացող գույքը հետ վերցնելու և օտարելու մասին կառավարության որոշման նախագիծը, որով նախատեսվում է վաճառել անշարժ և շարժական գույքը: ՀՀ ՊՆ Սեյրան Օհանյանը նշեց, որ գնորդ է հանդիսանում  «ՆՏԱԱ Ինվեստմենտ Գրուպ» ՍՊԸ-ն և գինը կազմում է 30 միլոն ԱՄՆ դոլարին համարժեք դրամ:

«Գնորդը պարտավորվում է վեց ամիս ժամկետով առնվազն 55 հազար դրամ նվազագույն աշխատավարձով պայմանագրեր կնքել ՊՈԱԿ-ում փաստացի աշխատող 99 հոգու հետ, պահպանել նույն`Կարեն Դեմիճյանի անվան մարզահամերգային համալիր անվանումը»,- ասաց Սեյրան Օհանյանը` հավելելով.

«Նախագծով նախատեսվում է հավանություն տալ ՍՊԸ-ի ներդրումային ծրագրին, որի ընդհանուր արժեքը գերազանցում է հարյուր միլիոն ԱՄՆ դոլարը: Ներդրումային ծրագիրը նախատեսվում է իրականացնել չորս տարվա ընթացքում և ստեղծել հյուրանոցներ, ջրաշխարհ, համերգային դահլիճներ, հանդիպումների սրահներ, ռեստորաններ, խանութներ, ինչպես նաև պետք է ապահովվի 250 նոր աշխատատեղի ստեղծում»: