Ադրբեջանին հաճոյանալու եւ գումար պոկելու նպատակով

Մոլդովայի խորհրդարանական փաստաբան Աուրելիա Գրիգորիուն ապրիլի 27-ին ժամանել է Բաքու՝  ֆորումի մասնակցելու: Այցի շրջանակներում նա հասցրել է բողոքել հայերից:

Հիշեցնենք, որ անցյալ տարի Գրիգորիուն ԱԺ-ում ընթացող «Իրավունքի գերակայության եվրոպական չափորոշիչները և իշխանությունների հայեցողության սահմանները Եվրոպայի խորհրդի անդամ երկրներում» թեմայով համաեվրոպական խորհրդաժողովի ժամանակ խայտառակ հայտարարություններով հանդես եկավ: Նա հայտարարեց, թե «Հայաստանը գրավել է Ադրբեջանի տարածքների 20 տոկոս՝ ադրբեջանցիների նկատմամբ իրականացնելով ցեղասպանություն», եւ իբր «Խոջալուի ցեղասպանությունն իրականացրել են հայերը, ինչն այլեւս միջազգայնորեն ճանաչված փաստ է»:

Ադրբեջանական haqqin.az-ը գրում է, որ Բաքվում լրագրողների հետ հանդիպման ժամանակ Գրիգորիուն բողոքել է, թե իբր հայերը այդ դեպքից հետո շարունակում են սպառնալ իրեն` հեռախոսով, համացանցի միջոցով: Նա անգամ հույս է հայտնել, որ շուտով իրեն հանգիստ կթողնեն, քանի որ Հայաստանն այս պահին ավելի կարևոր հարցեր ունի լուծելու:

Երևում է՝ մոլդովացի օմբուդսմենը դարձյալ արթնացել է քնից և որոշել հալածյալի կերպարի մեջ մտնել՝ Ադրբեջանին հաճոյանալու և նրանից գումար կորզելու ակնկալիքով: