Ոստիկանության կողմից կատարված աշխատանքները մեծապես նպաստել են վերջին տարիներին գրանցված հանցագործությունների թվաքանակի աճին. ոստիկանություն

Արդեն տեղեկացրել ենք, որ ոստիկանության հասարակայնության հետ կապերի եւ լրատվության վարչությունը Yerkir.am-ին հստակ հայտարարել է, որ մեր` «Ոստիկանության լրատվականը խախտում է օրենքը» հրապարակման պատճառով այլեւս մեզ հետ աշխատելու է գրավոր հարցումների տարբերակով: Մեր որեւէ բանավոր հարցի, անկախ դրա բարդության աստիճանից, ոստիկանության լրատվականը, արդեն տեւական ժամանակ է, հրաժարվում է պատասխանել` առաջարկելով գրավոր հարցում ուղարկել:

Yerkir.am-ը ընդունել է ոստիկանության լրատվականի` հորդոր ասենք, թե` պահանջը: Այսպիսով`  հերթական գրավոր հարցմանը սենսացիոն պատասխան ենք ստացել: Պարզվում է ` «Հանցագործությունները հաշվառումից թաքցնելու արատավոր գործելաոճի բացառման և քողարկված բնույթ կրող հանցագործությունների հայտնաբերման ուղղությամբ ՀՀ ոստիկանության կողմից կատարված աշխատանքները մեծապես նպաստել են վերջին տարիներին հանրապետությունում գրանցված հանցագործությունների թվաքանակի աճին» (բառացի մեջբերում):

Մենք, իհարկե, հասկանում ենք, որ այս «կիքսը» մեր ամեն հարցմանը պատասխանելիս գերլարվածության մեջ ընկնելու արդյունքն է, բայց դե չենք կարող չասել` տղե'րք, բանավոր զրույցների, հարցերին բանավոր պատասխանելու ժամանակ ավելի հանգիստ էիք, եւ լարվածություն ամենեւին չէր զգացվում: Այդուհանդերձ,  շնորհակալություն ենք հայտնում մեր հարցման բուն հարցերին պատասխանելու համար: Նյութը` վաղը:

Մեր հարցումն ու ոստիկանության պատասխանը` ստորեւ: