Մարդիկ արդյունք են ուզում տեսնել, կառավարությունը պետք է ''պլանկան'' բարձրացնի. Արթուր Բաղդասարյան

Որոտանի կասկադի վաճառքը փայլուն տնտեսական գործարք էր. համարում է ԱԱԽ քարտուղար Արթուր Բաղդասարյանը: «Այդքան ամերիկյան ներդրումը համարում եմ լուրջ ձեռքբերում, ես այդ գործարքի կողմնակիցն եմ»,- լրագրողների հետ հանդիպման ժամանակ ասաց նա` պատասխանելով Yerkir.am-ի այն հարցին՝ թե ինչպե՞ս է գնահատում կառավարության գործունեությունը և ռազմավարական կարևոր օբյեկտների վաճառքը:

Արթուր Բաղդասարյանը նշեց, որ ինքը կառավարությունից ակնկալում է  առավել արդյունավետ աշխատանք, այդ թվում` ՕԵԿ նախարարներից: «Կուտակված են լրջագույն խնդիրներ, և առավել համարձակ հայացք պետք է նետել այդ խնդիրներին»,- ասաց նա՝ հավելելով, որ 5 տարի առաջ ոչ ոք չգիտեր ինչ է ԱԱԽ-ն, իսկ այսօր այն ունի դրական առումով ամբիցիոզ նպատակներ:

«Մենք պատրաստ ենք աջակցել կառավարությանը, ուղղակի պետք է պլանկան բարձրացնել: Մարդիկ արդյունքներ են ուզում, սոցիալ- տնտեսական վիճակը ծանր է, և դրա լուծողը պետք է լինի կառավարությունը»,- ասաց Արթուր Բաղդասարյանը: