Գազի վարձավճարի մաս-մաս վճարում նախատեսված չէ. ''Հայռուսգազարդ''

«Հայռուսգազարդ»-ում չեն քննարկվել սպառած գազի դիմաց քաղաքացիների մաս-մաս վճարումների տարբերակներ, նման բան նախատեսված չէ: Այս մասին yerkir.am-ի հետ զրույցում ասաց «Հայռուսգազարդի» մամուլի քարտուղար Շուշան Սարդարյանը` պատասխանելով հարցին` արդյո՞ք «Հայռուսգազարդ»-ում քննարկվել են դեկտեմբեր ամսվա սպառած գազի դիմաց վճարման այլ տարբերակներ:

Ինչ վերաբերում է գազի որակին, Շուշան Սարդարյանը նշեց, որ գազի որակը կասկածներ չի կարող հարուցել, քանի որ այն համապատասխանում է միջպետական ստանդարտներին, իսկ ստուգումներն իրականացվում են ամեն օր: «Եթե անգամ «Հայռուսգազարդ»-ի ստուգումները արժանահավատ չեն, քաղաքացիները կարող են հետաքրքրվել խոշոր գազասպառողներից, որոնք նույնպես իրականացնում են իրենց ստուգումները` գազի որակի հետ կապված»,- ասաց նա` հավելելով, որ բացառվում է այն տարբերակը, որ խոշոր գազասպառողներին բարձրորակ գազ է մատակարարվել, իսկ քաղաքացիներին` ցածր որակի: