Կիվիրյանին առաջարկել են համաներմամբ խուսափել պատժից

Ակտիվիստ Արգիշտի Կիվիրյանին այսօր էլ են հրավիրել ՀՔԾ` արդեն 4-րդ անգամ հայտնելու Կոմիտաս 5-ի գործով նախաքննության ավարտի մասին:

Նշենք, որ ՀՔԾ-ն հանել է Կիվիրյանին` ՀՀ ՔՕ 333-րդ հոդվածի (սուտ մատնություն կատարելը) հատկանիշներով առաջադրված մեղադրանքը: Փաստորեն, եթե, ի վերջո, նախաքննությունն ավարտվի, և գործը մտնի դատարան, ակտիվիստին մեղադրանք կառաջադրվի միայն մեկ` ՀՀ ՔՕ 316-րդ հոդվածի (իշխանության ներկայացուցչի նկատմամբ բռնություն կիրառելը) հատկանիշներով:

Կիվիրյանը yerkir.am-ի հետ զրույցում նշեց, որ ինչպես 333-րդ հոդվածն առաջադրելը, այնպես էլ այն հանելն իր համար աբսուրդ էր և անհասկանալի: Նա տեղեկացրեց նաև, որ երեկ իրեն ՀՔԾ-ում առաջարկել են օգտվել 2013-ի հոկտեմբերի 3-ին հայտարարված համաներման ակտից և խուսափել պատասխանատվությունից, սակայն Կիվիրյանը գրավոր կերպով հրաժարվել է առաջարկից: