Քվեարկությունը հետաձգվեց. ՀՀԿ-ն բոյկոտո՞ւմ է

ԱԺ արտահերթ նիստում քննարկվում էր գազի համաձայնագրի վավերացման հարցը: ԱԺ նախագահը հորդորեց բոլոր պատգամավորներին ներկայանալ դահլիճ, որովհետև նախապես հայտարարվել էր, որ քվեարկությունը կկազմակերպվի ժամը 18:00-ին: Սակայն 18:00 անց Հովիկ Աբրահամյանը հայտնեց, որ քվեարկությունը տեղափոխվում է վաղը` ժամը 12-ին:

ՀՅԴ պատգամավոր Արծվիկ Մինասյանը առարկեց տեղից, ինչին ԱԺ նախագահը պատասխանեց. «Ես եմ ԱԺ նախագահը, ես գիտեմ ինչպես կազմակերպել աշխատանքները»:

Այդ ընթացքում ջուր խմելու համար միջանցք դուրս եկած ԱԺ պատգամավոր Էդմոն Մարուքյանը լրագրողներից իմացավ, որ քվեարկությունը հետաձգվել է: «Լո՞ւրջ: Ես էլ ախր տեսնում եմ, որ քվորում չկա` հանրապետականները դահլիճում չէին»,- ասաց պատգամավորը:

ԱԺ փոխնախագահ Էդուարդ Շարմազանովից հետաքրքրեցինք. «Հնարավո՞ր է` ՀՀԿ-ն բոյկոտում է»: Նա պատասխանեց, որ նման բան չկա, պարզապես հարցերը չեն ավարտվել այդ ժամին, ահա, թե ինչու քվեարկությունը հետաձգվեց:

Ավելի ուշ Հովիկ Աբրահամյանը հայտարարեց, որ քվեարկությունը լինելու է երկուշաբթի օրը` ժամը 12:00-ին: