''Ջրծաղիկի գործով'' դատավորն անակնկալ որոշում կայացրեց

Էրեբունի և Նուբարաշեն վարչական շրջանների ընդհանուր իրավասության դատարանը՝ դատավոր Վլադիմիր Գրիգորյանի նախագահությամբ, քիչ առաջ անակնկալ որոշում կայացրեց` վերսկսել ժամկետային զինծառայող Հայկ Խաչատրյանի մահվան փաստով հարուցված քրեական գործի դատաքննությունը:

Կենտրոնական կլինիկական զինվորական հոսպիտալի պետ Միքայել Միքայելյանը, հոսպիտալի նյարդաբանական բաժանմունքի պետ Մինաս Մկրտչյանը և նրանց պաշտպանները միջնորդել էին համաներման ակտվ կարճել գործը, և դատավարական կողմերը գրեթե վստահ էին, որ այսօր դատարանը գործը կարճելու վճիռ պետք է կայացնի:

Հիշեցնենք, որ զինվորը մահացել է 2011 թ. դեկտեմբերի 30-ին «Նորք» ինֆեկցիոն հիվանդանոցում:

Դատավորն իր այդ որոշումը պատճառաբանեց նրանով, որ գործը կարճելու միջնորդության քննարկմանը տուժող կողմը ներկա չի եղել և դատարանի կողմից ուղարկված գրությանը չի պատասխանել: Այսպիսով` դատավորը հնարավորություն տվեց տուժող կողմին հայտնել իր դիրքորոշումը և դատավարական կողմերի համար հավասար իպայմաններ ապահովել:

Հիշեցնենք, որ գործը կարճելու միջնորդությունից առաջ տուժողի իրավահաջորդ Մովսես Խաչատրյանը և նրա ներկայացուցիչ Մուշեղ Շուշանյանը լքել էին դատական նիստերի դահլիճը՝ խոստանալով այլևս չմասնակցել այս գործով նիստերին:

«Հո ես նրանց նկատմամբ քեն չեմ քաշելու, հարգենք իրար, եկեք բոլորիս համբերությունն անսահման դարձնենք: Շուտով պետք է նշեն Հայկ Խաչատրյանի մահվան տարելիցը: Եկեք հաջորդ նիստը հետաձգենք նոր տարուց հետո, տուժող կողմին հրավիրենք դատարան, եկեք մարդկային նոտայով մտածենք, պետք չէ մեկուկես տարվա տանջանքը ջուրը լցնենք, դա բարոյական չէ»,- հայտարարեց դատավորը և հորդորեց բուռն չընդունել իր այս որոշումը:

«Ես երդում եմ տվել նախագահին՝ դրսևորել մարդասիրություն, ցանկացած օրենքի հիմքում հումանիստություն է»:,- հավելեց նա:

Ամբաստանյալ Մինաս Մկրտչյանի պաշտպան Լևոն Պողոսյանը նախ հայտարարեց, որ կբողոքարկի այդ որոշումը, սակայն հետո համաձայնեց դատավորի որոշման հետ:

«Նիստը հայտարարում եմ փակված: Բոլորի Նոր տարին շնորհավոր լինի»,- մաղթեց դատավորը: