Ֆիզկուլտուրայի ուսուցչին կալանավորեցին

Արդեն հայտնել ենք, որ նոյեմբերի 5-ին Մաշտոցի պողոտայում տեղի ունեցած անկարգությունների ժամանակ բերման ենթարկված, հետո նաև ձերբակալված Սևակ Մնացականյանը Երևանի թիվ 147 ավագ դպրոցի ֆիզկուլտուրայի ուսուցիչն է:

Սևակ Մնացականյանի ձերբակալման 72 ժամը լրանալուց հետո Կենտրոնի դատարանը որոշում է կայացրել նրա նկատմամբ խափանման միջոց ընտրել կալանավորումը: Ուսուցչին մեղադրանք է առաջադրվել ՀՀ ՔՕ 316-րդ հոդվածի հատկանիշներով`իշխանության ներկայացուցչի նկատմամբ բռնություն գործադրելը:

Հիշեցնենք, որ մեղադրյալի հարազատները yerkir.am-ին հայտնել էին, որ միջադեպի ժամանակ Սևակն ընդամենը փորձել է օգնել ընկերոջը, որին ոստիկանները քաշքշում էին, սակայն այդ պահին նրան բռնի ուժով տեղափոխել են բաժին: