Կարմիր բերետավորները բերման են ենթարկել ֆիզկուլտուրայի ուսուցչին

Նոյեմբերի 5-ին Մաշտոցի պողոտայում տեղի ունեցած անկարգությունների ժամանակ բերման ենթարկվածներից ոմանք ընդհանրապես առնչություն չունեին միջադեպի հետ (օրինակ` թռչուններ կերակրողը), շատերին էլ տարել էին կամա, թե ակամա հրմշտոցի մեջ հայտնվելու համար:

Այս լուսանկարում պատկերված երիտասարդը Մաշտոցի պողոտայում տեղի ունեցած անկարգությունների ժամանակ բերման ենթարկված, իսկ այժմ արդեն ձերբակալված Սևակ Մնացականյանն է: Yerkir.am-ի տեղեկություններով` նա  Երևանի թիվ 147 ավագ դպրոցի ֆիզկուլտուրայի ուսուցիչն է:

Սևակին մեղադրանք է առաջադրված 316-րդ հոդվածի հատկանիշներով`իշխանության ներկայացուցչի նկատմամբ բռնություն գործադրելը: Մեղադրյալի խոսքով` միջադեպի ժամանակ ինքն ընդամենը փորձել է օգնել ընկերոջը, որին ոստիկանները քաշքշում էին, սակայն այդ պահին իրեն բռնի ուժով տեղափոխել են բաժին: Սևակ Մնացականյանի ձերբակալման 72 ժամը լրանալուց հետո միայն պարզ կդառնա` կկալանավորե՞ն նրան, թե՞ ոչ:

Yerkir.am-ի հետ զրույցում Սևակի հարազատները հայտնեցին, որ իրենց թույլ չեն տալիս տեսակցել նրան: Այն, որ հարազատների հետ տեսակցելու` ձերբակալվածների իրավունքը խախտվել է, հաստատել է նաեւ ՀՀ ոստիկանության ձերբակալված անձանց պահելու վայրերում վերահսկողություն իրականացնող դիտորդական խումբը: