Հերմինե Նաղդալյանն իրեն տեսնում է «ֆիզկուլտուրայի և սպորտի» հանձնաժողովի ղեկավարի պաշտոնում

ԱԺ` արդեն նախկին փոխխոսնակ Հերմինե Նաղդալյանն այսօր դժկամությամբ պատասխանեց լրագրողների հարցերին, որոնք վերաբերում էին նոր ԱԺ-ում դերերի բաշխմանը:

Նա հերքեց տեղեկությունները, թե իրեն նշանակելու են Վրաստանում Հայաստանի դեսպան: «Ճիշտ չէ, դեսպանի մասին հրապարակված է, դուք էլ տեղյակ եք՝ ով է Վրաստանում դեսպան նշանակվելու»,- ասաց Նաղդալյանը:

Հարցին` իսկ պահպանելո՞ւ է պաշտոնը ԱԺ-ում, պատասխանեց. «Իսկ ինչո՞ւ եք ուզում ժամանակից շուտ այդ մասին իմանալ, երբ լինի ԱԺ առաջին նիստը, այդ ժամանակ կիմանաք»:

Հարցին՝ իսկ ո՞ր հանձնաժողովում եք Ձեզ պատկերացնում, Նաղդալյանը պատասխանեց. «Ֆիզկուլտուրայի և սպորտի»: Դիտակմանը, թե նման հանձնաժողով չկա, արձագանքեց. «Կստեղծենք, եթե անպայման ինձ ինչ-որ հանձնաժողովում ուզում եք տեսնել, ինչ-որ գործի տեղավորել»: