Լաց լինելը, մանավանդ` երբ վկա չկա, քաղցր բան է. Սոս Սարգսյան

Գիտե՞ք, մեկ-մեկ լաց լինելը, մանավանդ` երբ վկա չկա, քաղցր բան է, փորձեք. Սոս Սարգսյան

-Պա'պ, շա՞տ ես հավեսի համար լացում:

-Հա, ես լացկան մարդ եմ: Ամեն չնչին բանից վիրավորվում եմ, լաց լինում, առանց պատճառի էլ եմ լաց լինում:

Հա, պապ, դու լացկան մարդ էիր, բայց ստիպում էիր, որ ես ժպտայի, որ մենք ժպտայինք:

-Էլի քիթդ կախեցի՞ր,- էս խոսքը բավական էր ժպտալու համար:

Հիմա դժվար է անցնել ձեր տան մոտով ու չնայել պատշգամբին` մեկ է, հրաշք չեմ տեսնելու:

-Ալո, պա'պ, տա՞նն ես: Հիմա ձեր պատշգամբի դիմացն եմ:

-Բա ներս արի, հո խալխի տո՞ւն չի: Չնայած Հայաստանում խալխ չկա:

Հիմա դժվար է անցնել ձեր տան մոտով…

Ծնունդդ շնորհավոր, պա'պ: Նվերդ ժպիտս է, իսկ հավեսի համար կարելի է լացել տարվա մյուս օրերին:

Կարինե ՀԱՐՈՒԹՅՈՒՆՅԱՆ