Ծատուրյանին աշխատանքից ազատելու մասին խոսք լինել անգամ չի կարող

Արդեն տեղեկացրել էինք, որ Ilur.am-ի տեղեկություններով` այսօր` ժամը 16:00-ին, մշակույթի նախարար Հասմիկ Պողոսյանի մոտ է կանչվել Գյումրիի Վարդան Աճեմյանի անվան թատրոնի գեղարվեստական ղեկավար, ՀՀ ժողովրդական արտիստ, պրոֆեսոր Նիկոլայ Ծատուրյանը: Ըստ կայքի տեղեկությունների` նախարարը պատրաստվում է աշխատանքից ազատել Ծատուրյանին, քանի որ վերջինս օրերս «Գալա»-ին տված հարցազրույցում Կաթողիկոս Գարեգին Բ-ին քննատադել էր` նրան համարելով սատանա:

Yerkir.am-ին ՀՀ մշակույթի նախարարության մամլո ծառայությունից տեղեկացրին, որ Ծատուրյանին աշխատանքից ազատելու որեւէ ծանուցում կամ հրաման չկա:

Գյումրիի Վարդան Աճեմյանի անվան թատրոնի տնօրեն Գեւորգ Խաչատրյանն էլ իր հերթին yerkir.am-ի հետ զրույցում նշեց, որ նախարարի հետ հերթական հանդիպումն է լինելու:

«Սովորական հանդիպում է, նախարարն ուղղակի կանչել է Ծատուրյանին: Նրան աշխատանքից ազատելու մասին խոսք լինել չի կարող: Եւ հետո` թատրոնի գեղարվեստական ղեկավարին, ըստ օրենքի, գործից ազատում է թատրոնի տնօրենը, իսկ ես Ծատուրյանին ազատելու ցանկություն չունեմ»,-ասաց Խաչատրյանը: