Հայաստանում ''Պուտին'' ակումբներ բացողին պարգեւատրեցին ''ԱԺ Պատվո մեդալ''-ով

ԱՊՀ երկրների երիտասարդական միության խորհրդի նախագահ Անդրանիկ Նիկողոսյանը ՀՀ ԱԺ նախագահ Հովիկ Աբրահամյանի կողմից այսօր պարգևատրվել է «ՀՀ Ազգային ժողովի պատվո մեդալ»-ով` Եվրասիական ինտեգրացիոն գործընթացներում ԱՊՀ երկրների երիտասարդական միության ցուցաբերած ակտիվ մասնակցության համար:

Հիշեցնենք, որ Անդրանիկ Նիկողոսյանը ժամանակին իրեն կոչում էր «մեդիամագնատ»: Նրա «շնորհիվ» 2011թ.-ից Հայաստանում գործում են «Ռուսական գրքի տուն» կենտրոնները, ուր պետք է բացվեին «Պուտին» ակումբներ:

«2013թ. Անդրանիկ Նիկողոսյանը ղեկավարում է Եվրասիական ազգային շարժումը, որն ուղղված է աջակցելու Հայաստանի Մաքսային միությանը անդամակցելու արտաքին քաղաքականության ծրագրին և Եվրասիական ինտեգրացիոն գործընթացներին մասնակցելուն: 2010 թվականին ՌԴ նախագահ Դմիտրի Մեդվեդևի հրամանագրով Անդրանիկ Նիկողոսյանը ՌԴ մշակութային զարգացման, արտերկրում ռուս մշակույթի, ինչպես նաև ռուսերենի զարգացման և տարածման համար պարգևատրվել է «Բարեկամության շքանշան»-ով, իսկ 2013 թվականին ՌԴ նախագահի աշխատակազմի ղեկավար Սերգեյ Իվանովի կողմից՝ «Պատվո շքանշան»-ով»,-նշվում է Անդրանիկ Նիկողոսյանի կենսագրության մեջ: