Ինչու արհմիությունները չեն կատարում իրենց գործառույթը

Արհմիությունները ոչ միայն առաջինը չբարձրացրեցին տրանսպորտի թանկացման անթույլատրելիության հարցը, այլև չմիացան բողոքի շարժմանը, մինչդեռ դրանք կոչված են պաշտպանել աշխատավորության շահերը. այսօր մամուլի ասուլիսի ժամանակ ասաց Արհմիությունների կոնֆեդերացիայի ներկայացուցիչ Կառլեն Հարությունյանը:

Ըստ նրա` ինքը միայնակ է կոնֆեդերացիայում նման իրավիճակի դեմ պայքարում: «Ամբողջ խնդիրը կոնֆեդերացիայի նախագահի մեջ է, ով բազմիցս կառավարության նիստերում հնարավորություն է ունեցել բարձրաձայնելու կազմակերպության գույքի, մասնավորապես` 100 տուրիստական հանգրվանների օտարացման և դրանց գումարներների փոշիացման հարցը, սակայն ոչինչ չի արել»,- ասաց Կառլեն Հարությունյանը:

Նա հայտնեց, որ ինքը դիմել է նաև գլխավոր դատախազություն` խնդիրը պարզելու համար, սակայն դատախազությունը նույնպես լուծում չի տվել խնդրին:

Սպառողների միության նախագահ Արմեն Պողոսյանի խոսքերով` արհմիությունների գույքը պետական չէ, սակայն այն առգրավվել է` որպես պետական գույք: Խնդրի երկրորդ պատճառը ձեռնարկությունների բացակայությունն է: Սակայն, ըստ Պողոսյանի, չի կարելի խնդիրը կապել միայն մեկ անձի` ղեկավարի հետ: «Սա գալիս է նաև տնտեսական անխելք կառավարումից»,- նշեց նա: