Իրավապաշտպանը ողջունում է լրագրողների մտադրությունը

Մի խումբ հայ լրագրողներ ցանկություն են հայտնել նամակով դիմել Ռուսաստանի Ժուռնալիստների միություն և այն լրատվամիջոցների ղեկավարներին, ովքեր Հրաչյա Հարությունյանի վերաբերյալ տեղեկություններ հրապարակելիս թույլ են տվել էթիկայի նորմերի կոպտագույն խախտումներ, կարգի հրավիրել:

«Լրագրողներ հանուն մարդու իրավունքների» ՀԿ-ի նախագահ, իրավապաշտպան  Ժաննա Ալեքսանյանը, ողջունելով լրագրողների մտադրությունը, հույս հայտնեց, որ այն անպայման արձագանք կստանա: Նրա  կարծիքով` հայ վարորդ Հրաչյա Հարությունյանին նվաստացնելը հուշում է, թե այս գործով ինչ քննություն է ընթանալու:

Իրավապաշտպանը, «Մեդիա կենտրոն»-ում կազմակերպված քննարկման ժամանակ  գնահատելով  հայ հասարակության և լրատվամիջոցների արձագանքը վարորդին պաշտպանելու գործում, դժգոհությունը հայտնեց  վթարի վերաբերյալ ռուսական լրատվամիջոցների ցուցաբերած բացահայտ կողմնապահության, ատելության ու արհամարհական վերաբերմունքի վերաբերյալ:

Սակայն, ըստ նրա, կային որոշ լրատվամիջոցներ, որոնք համաչափ էին ներկայացնում իրավիճակը: «Օրինակ` newsru.com-ի վերջին հրապարակումը չեզոք էր, gazeta.ru-ն և այլ ազդեցիկ լրատվամիջոցներ նորմալ էին լուսաբանում»,- ասաց նա և հավելեց, որ լավ կլինի, եթե մենք հետևենք այս գործի քննությանը և այն լուսաբանենք:

Ըստ նրա` այս օրերին  Հայաստանում բարձրացված աղմուկը  և պաշտպանի նամակը, որոշ չափով մեղմեցին իրավիճակը: