Փոխվարչապետը հերքեց` "Տոյոտա"-ի սեփականատերերից չէ

Այն, ինչ իր տարեկան հաշվետվության մեջ նշել է Վերահսկիչ պալատը, ավելի կոպիտ ասել է Սերժ Սարգսյանը կառավարության հետ ունեցած հայտնի խորհրդակցության ժամանակ. համարում է ԱԺ ՀԱԿ խմբակցության պատգամավոր Նիկոլ Փաշինյանը: Եվ հիմա, ըստ նրա, երբ փոխվարչապետ Արմեն Գեւոգյանը հերքում է ՎՊ-ին, պետք է հերքի նաեւ Սերժ Սարգսյանին:

Ըստ պատգամավորի` թեեւ Սերժ Սարգսյանը կառավարության քառամյա գործունեությունը` «ատկատների», չարաշահումների, յուրացումների, որակի առումով գնահատել էր խիստ բացասական, սակայն նույն այդ կառավարությունը շարունակում է պաշտոնավարել նույն ղեկավարով: «Սերժ Սարգսյանն ասում էր` գլխից պետք է բռնենք, իսկ դուք եկել եք, ասում եք` Վայոց ձորի գյուղատնտեսության վարչության պետին բռնել ենք»,- նշեց Փաշինյանը:

ՀԱԿ պատգամավորը Արմեն Գեւորգյանից հետաքրքրվեց նաեւ, թե արդյոք իրե՞ն է պատկանում «Տոյոտա» ընկերության բաժնետոմսերի մի մասը, որից գնումներ են կատարում պետական համակարգի կառույցները, եւ դա էլ «ատկատի» ձեւերից մեկն է:

Գեւորգյանը հերքեց, որ ինքը «Տոյոտա» ընկերության բաժնետերերից է, բայցեւ նկատեց, որ պետական համակարգում մեքենաները միայն «Տոյոտա»-ից չեն գնում: Նա նաեւ հայտարարեց, որ այսօր ոչ թե քաղաքական քննարկումներ են, այլ ՎՊ-ի անցած տարվա հաշվետվությունն են քննարկում: «Իհարկե, կարելի է իմ ասածները տարբեր ձեւով մեկնաբանել, ես իմ ելույթում որեւէ հերքում կամ ամփոփիչ գնահատական ՎՊ-ի հաշվետվությանը չեմ ներկայացրել, ես ընդամենը ներկայացրել եմ մեր մեկնաբանությունները այն դրվագների վերաբերյալ, որոնք արտացոլված են ՎՊ-ի զեկույցում»,- հայտարարեց փոխվարչապետը:

Իր հերթին, Փաշինյանը նշեց, որ անգամ վիկիլիկսյան հրապարակումներում Գեւորգյանը մատնանշված է որպես «Տոյոտա» ընկերության մեկ երրորդի սեփականատեր: