ԱՄՆ-ը չի ճանաչում Իսրայելի` բնակավայրեր կառուցելու օրինականությունը

ԱՄՆ-ը չի ճանաչում Իսրայելի կողմից պաղեստինյան օկուպացված տարածքներում բնակավայրերի կառուցման օրինականությունը. հայտարարել է ԱՄՆ պետդեպարտամենտի մամուլի քարտուղար Ջեն Փսակին` մեկնաբանելով Իսրայելի մտադրությունը եւս 538 տուն եւ բնակարան կառուցել Հորդանանի Արեւմտյան ափին:

Ըստ նրա` ամերիկյան իշխանությունները տեսել են այդ թեմայի վերաբերյալ մամուլի տեղեկատվությունը: «Մեր դիրքորոշումը մնում է նույնը: Պետքարտուղարը մտահոգություն է հայտնել այդ կապակցությամբ ինչպես հրապարակայնորեն, այնպես էլ մասնավոր կարգով»,- ասել է Փսակին` հավելելով, որ Ջոն Քերին ծրագրում է մոտ ժամանակներս նոր այց կատարել տարածաշրջան եւ խորհրդակցություններ անցկացնել իսրայելական ու պաղեստինյան կողմերի հետ:

Պատասխանելով լրագրողների հարցին, թե ինչո՞ւ  ԱՄՆ վարչակազմը չի սպառնում Իսրայելին շինարարության շարունակման դեպքում պատժամիջոցներ կիրառել, Փսակին ասել է, որ «դա ընթացիկ պլանների մեջ չի մտնում»: Միաժամանակ, խոստովանել է, որ ԱՄՆ-ը կշարունակի պատժել պաղեստինցիներին, եթե նրանք շարունակեն ՄԱԿ-ի համակարգի ինստիտուտներում միակողմանի ճանաչման գործընթացը: