ՀՀԿ-ն ու ՕԵԿ-ն ընտրողներին համոզելու խնդիր չունե՞ն

«Սիվիլիթաս» հիմնադրամը, ԱՄՆ միջազգային զարգացման գործակալության եւ «Քաունթերփարթ ինթերնեյշնլի» հայաստանյան գրասենյակի աջակցությամբ, կազմակերպել էր Երեւանի ավագանու ընտրություններին մասնակցող կուսակցությունների ցուցակները գլխավորող գործիչների բանավեճ: Չէին ներկայացել կոալիցիոն կուսակցությունների` ՀՀԿ-ի և ՕԵԿ-ի ներկայացուցիչները:

«Մարդիկ չեն պատրաստվում վերընտրվել, նրանք պատրաստվում են վերարտադրվել: Իշխանություններն ընտրողին համոզելու խնդիր չունեն, եթե ունենային` կմասնակցեին բանավեճին»,- ասաց Երևանի ավագանու ընտրություններում ՀՅԴ ցուցակը գլխավորող Արմեն Ռուստամյանը` անդրադառնալով կոալիցիոն ուժերի բացակայությանը:

Նրա կարծիքով`  Երևանում բոլոր խնդիրները փոխկապակցված են, և դրանց միակ լուծումը միահեծան իշխանություններից ազատվելն է: «Քաղաքապետն այսօր կամավոր հրաժարվել է իր լիազորություններից: Նա իրավունք չունի ինքնուրույն քայլեր անելու` ՀՀԿ-ն ինչ ասի, պետք է անի»,- հայտարարեց նա և հավելեց, որ Տարոն Մարգարյանը ենթարկվում է իրեն ազատող-նշանակողին, ոչ թե ժողովրդին:

Ըստ Ռուստամյանի` եթե իսկապես արդար, թափանցիկ կառավարման համակարգ չլինի Երևանում,  բոլոր խնդիրները կմնան անլուծելի: «Քաղաքապետարանում պետք է հակակշիռ ձևավորվի. եթե չենք կարողացել նախագահին փոխել, կարող ենք քաղաքապետին փոխել: Ընդդիմադիր քաղաքապետն ամեն ինչ կանի` ամբողջացնելու իր լիազորություների շրջանակը»,- ասաց ՀՅԴ թեկնածուն: