Քրդերը 6 պայման են առաջադրում

Քրդստանի ընկերակցությունների միության գործադիր խորհրդի նախագահ Մուրատ Քարայըլանը երեկ մամուլի ասուլիսի ժամանակ անդրադարձել է քուրդ գրոհայինների` Թուրքիան լքելու ժամկետներին ու պայմաններին. տեղեկացնում է Regnum-ը:

Ըստ նրա` ՔԲԿ-ի ուժերի դուրսբերումը կսկսվի մայիսի 8-ից, գործընթացը կդադարեցվի, եթե թուրքական ռազմական գործողություններ կամ հարձակումներ լինեն: Քարայըլանը նաեւ թվարկել է 6 պայման, որոնց անհրաժեշտ է հետեւել գործընթացը չդադարեցնելու համար:

1. Պարտիզանական ուժերը պետք է դուրս գան այն երթուղիներով, որոնք կիրառել են մինչ օրս: Գործընթացը պետք է անցկացվի կազմակերպված, առանց բախումների:

2. Գործընթացը կսկսվի մայիսի 8-ին, կիրականացվի փուլ առ փուլ եւ կավարտվի հնարավորինս արագ:

3.  Թուրքիայից դուրս գալուց հետո ՔԲԿ-ն տեղակայվելու է Հարավային` իրաքյան Քրդստանում: ՔԲԿ-ն սպասում է, որ համապատասխան իշխանությունները, մասնավորապես` իրաքյան Քրդստանի կառավարությունը, ուշադրություն կդարձնի իր տարածքում պարտիզանական ուժերի ներկայությանը:

4. Թուրքական զինված ուժերի համար պարտադիր է գործընթացին պատասխանատու եւ լուրջ մոտեցումը, որպեսզի այն չընդհատվի ցանկացած հարձակման, գործողության եւ ռմբակոծման հետեւանքով, որոնց պարտիզանները կպատասխանեն անհրաժեշտ պաշտպանության շրջանակներում:

5. Թուրքական պետության ուժերը պետք է խուսափեն սադրանքներից, որոնք կարող են հանգեցնել ռազմական ակտիվության կամ բախումների Քրդստանում:

6. Անկախ պատվիրակությունների մոնիտորինգն ու երկու կողմի սխալների բացահայտումը նույնպես կարող են նպաստել գործողության հաջողությանը:

Քարայըլանն ընդգծել է, որ  կարգավորման ժողովրդավարական գործընթացը երեք փուլ է ներառում: Առաջինը, ըստ նրա, հրադադարի` արդեն սկսված գործընթացն է եւ ՔԲԿ զինյալների դուրսբերումը: Երկրորդ փուլում քայլեր պետք է անի պետությունը, մասնավորապես` Թուրքիայի Սահմանադրության մեջ հարկ է փոփոխություններ անել: Երրորդ փուլը բնականոնացման գործընթացն է, որը ենթադրում է կայունություն, սոցիալական հաշտեցում, հավասարություն եւ ազատություն: Գրոհայինների զինաթափումը օրակարգում կլինի այդ գործընթացի իրագործումից հետո, ընդ որում` պետք է ազատ արձակվեն բոլոր բանտարկյալները, այդ թվում` առաջնորդ Աբդուլլահ Օջալանը: