Ջաղինյանը դեմ չէ ղեկավարել Հանրային հեռուստառադիոխորհուրդը

Հանրային հեռուստառադիոխորհրդի նախագահ Ալեքսան Հարությունյանը երեկ «Հայկական ժամանակի» հետ զրույցում հերքել է տեղեկություններն այն մասին, թե հնարավոր է` ինքն առաջիկայում Ֆրանսիայում ՀՀ դեսպան նշանակվի:

«Ինձ հետ նման որեւէ խոսակցություն չի եղել: Վերջին օրերի այս բոլոր խոսակցությունների մեջ ճիշտը միայն այն է, որ փետրվարի 1-ին լրանում է իմ պաշտոնավարման ժոմկետը, եւ ըստ գործող օրենքի` ես այլեւս չեմ կարող առաջադրվել այդ պաշտոնում»,- ասել է Հարությունյանը:

Հիշեցնենք, լուրեր էին պտտվում, թե Հարությունյանին այդ պաշտոնում կարող է փոխարինել Սերժ Սարգսյանի մամուլի խոսնակ Արմեն Արզումանյանը կամ «Շարմ» հոլդինգի ղեկավար Ռուբեն Ջաղինյանը: Արզումանյանը երեկ հայտարարել է, թե բամբասանքներ չի մեկնաբանում, իսկ Ջաղինյանը երեկ «ՀԺ»-ի թղթակցին ասել է, թե իր անվան շուրջ խոսակցությունները մի քանի տարի է` շրջանառվում են, բայց իրեն նման առաջարկ չի եղել:

«Եթե առաջարկեն, կմտածեմ: Կարծում եմ` սա շատ պատասխանատու եւ հետաքրքիր պաշտոն է, եւ պիտի հասկանամ, թե որքանով կարող եմ այդ պաշտոնը ստանձնելուց հետո այդ աշխատանքը կատարել»,- ասել է Ջաղինյանը: