Մահացել է ՀՀ սպորտի վարպետ Վահան Ասատրյանը

Երեկ երեկոյան Ֆրանսիայի հիվանդանոցներից մեկում մահացել է ՀՀ սպորտի վարպետ, միջազգային կարգի մրցավար, նախկին բասկետբոլիստ Վահան Ասատրյանը:

Բոլորովին վերջերս երկարատև հետազոտություններից հետո 45-ամյա Վահան Ասատրյանի  մոտ հայտնաբերվել էին երիկամների անբավարարություն, բազմակի միելոմա (արյան քաղցկեղ) հիվանդությունները:

Հայաստանի բասկետբոլի ֆեդերացիայի աջակցությամբ` Վահան Ասատրյանը կիրակի օրը` ապրիլի 7-ին, մեկնում էր Գերմանիա` բուժվելու, սակայն Ֆրանսիայի օդանավակայանում կտրուկ վատացել էր նրա առողջական վիճակը և նրան տեղափոխել էին հիվանդանոց: Բժիշկներին չի հաջողվել փրկել նրա կյանքը:

Նախկին բասկետբոլիստը աշխատում էր «Մխիթար Սեբաստացի» կրթահամալիրում` որպես մարզիչ-մանկավարժ: 2005թ.-ից Վ. Ասատրյանը, որպես բարձրակարգ մասնագետ, հրավիրվել էր Ֆիզիկական կուլտուրայի պետական ինստիտուտ: 1996թ.-ին ճանաչվել էր Եվրոպայի լավագույն մրցավար: