Սերժ Սարգսյանի ելույթը` բացակա հայացքով, անգիր արած տեքստով. Ռուբեն Հախվերդյան

«Երեկ ինձ համար զվարճալի շոու էր եւ, ճիշտ է, Րաֆֆիի ելույթի մեջ ջուրը շատ էր, բայց Սերժ Սարգսյանի ելույթը... Բացակա հայացքով, անգիր արած տեքստով»,- լրագրողների հետ հանդիպման ժամանակ նշեց երգիչ, երգահան Ռուբեն Հախվերդյանը: Ըստ նրա` ոստիկանությունը հրահանգ էր ստացել ժողովրդի հետ փափուկ լինել, չկրակել: Ըստ Հախվերդյանի` մենք «հումանիստ ոստիկանապետ» ունեինք` երեկվա դրությամբ:

«Ժողովուրդը ոչ թե Րաֆֆիի կողմն է, այլ դեմ է այս իշխանություններին, եւ ես էլ Րաֆֆիի կողքին եմ կանգնել, քանի որ դեմ էի Սերժ Սարգսյանին: Ընտրություններին չէի գնացել, քանի որ գիտեի, թե ով է ընտրվելու»,- ասաց Հախվերդյանը:

Նրա կարծիքով` բողոքի ցույցերը շարունակվելու են, քանի որ ժողովուրդն այլեւս չի կարող համբերել: Հախվերդյանը հավաստիացնում է, որ հիմա մարդիկ ավելի շատ փախչում են ոչ թե սովից, այլ «ֆաշիստական ռեժիմից»: Հախվերդյանը ստեղծված իրավիճակից ելք չի տեսնում, դա իր համար հանելուկ է:

«Երեկ մոմավառություն եղավ, Րաֆֆին Ծիծեռնակաբերդ գնաց, ինչը, իմ կարծիքով, պետք չէր: Եթե Րաֆֆին հիասթափեցնի ժողովրդին, ապա ուրիշ լավ տղերք էլ կան, օրինակ` Ժիրայր Սեֆիլյանը»,- ասաց նա` հավելելով, որ ինքը չի հիասթափվել Րաֆֆիից, քանի որ վերջինս ազնիվ է. «Նա մի մարդ է, որը գործարքի մեջ չի մտել նախկին իշխանությունների հետ, ինչն արել է Սերժ Սարգսյանը: Հիմա էլ Սարգսյանը կոռուպցիայի դեմ է պայքարում, այսինքն` ինքն իր դեմ»: