Պարտադրված գործազրկություն

Այս օրերին հանրապետությունում ընթանում են եւ սպասվում են զանգվածային կրճատումներ: Ըստ մեր տեղեկությունների` կրճատումներ են իրականացվել Շիրակի մարզի Ախուրյան գյուղի եւ մի շարք այլ բնակավայրերի կադաստրներում: Աշխատողներին ստիպել են դիմումներ գրել` ասելով, թե իբր համակարգը գնում է փոփոխությունների, որից հետո կրկին աշխատանքի կընդունեն:

Բնականաբար, ո՛չ աշխատողները, ո՛չ գործատուները, ո՛չ էլ, առավել եւս, մենք, վստահ չենք, որ այդ մարդիկ դարձյալ աշխատանքի կանցնեն: Նույնը սպառնում է Գեոդեզիայի եւ քարտեզագրության ինստիտուտին: Այստեղ, սակայն, իրավիճակը մի փոքր այլ է: Ըստ տեղեկությունների` ինստիտուտի տնօրինությունը կանչել է բոլոր աշխատողներին, որոնց թիվն անցնում է 100-ից, եւ հրահանգել դիմումներ գրել, այլապես ստիպված կլինեն իրենք կրճատումներ անել: Պատճառն այն է, որ ինստիտուտն ունի հսկայական պարտքեր եւ կանգնած է սնանկ ճանաչվելու վտանգի առջեւ: