Չարաբաստիկ կնոջը լսած տուժողի բնակարանը, կարծես, իրենը չէր

Մի բնակարանը մի քանիսին վաճառելու գործով այսօրվա դատական նիստում վերջապես սկսվեց խաբված գնորդների հարցաքննությունը: Հիշեցնենք, որ մեղադրական եզրակացությամբ` այս գործով հանդես կգա 254 տուժող:

Առաջինը ցուցմունք տվեց 75-ամյա Արա Տոնոյանը, ով պայմանագիր է կնքել «Գապբնակշինի» նախկին ղեկավար Գագիկ Պապոյանի հետ և 75 հազար դոլարով բնակարան  գնել Արամի 72 հասցեում, որը մինչ օրս  չի ստացել: Տուժողը դատարանին պատմեց իր` բնակարան գնելու մտադրության և Գ. Պապոյանի հետ ծանոթանալու հանգամանքների մասին:

«Ես չարաբաստիկ կնոջս ցանցն եմ ընկել»,- խոստովանեց տուժողը և հավելեց, որ, Նոր Արեշում գտնվող իր սեփական տունը վաճառելով 80 հազար դոլարով, ցանկացել է նոր բնակարան գնել:

«Գնում էինք, տարբեր շենքերում բնակարաններ նայում, բայց  ոչ մեկը կնոջս սրտով չէր: Ասում էր` էս պատը մրոտ ա, էս պատը հին ա և այլն: Վերջը  «Գինդով»  տուն գտավ, որ զանգեմ էդ չարաբաստիկ բրոկերին: Հետը պայմանավորվեցի, ասաց` կգաք Մալուբոյա, Մոլբոռնոյա (դատավարության մասնակիցները հուշեցին` «Մալիբու» սրճարան),  դրա մոտ:  Էս զզվանք արարածն ինձ խաբեց, որովհետև իմ տեսած տունը բոլորովին ուրիշ տեղ էր և արժեր 65 հազար դոլար: Ինձ ասաց` ձա'ձ ջան, արի ավելի լավ տուն առաջարկեմ, և բերեց այս գեղեցիկ, ամենազոր ընկերոջ մոտ»,- մատնանշելով Գ. Պապոյանին` ասաց խաբված գնորդը: 

«75 հազար չալաղաջը (նկատի ունի դոլարը) տվեցի Պապոյանին, պայմանագիրը ստորագրեցի, 72 քմ բնակարանի բանալիները վերցրի և կնոջս հետ գնացի բնակարանը տեսնելու»,- ասաց նա:

Տուժողի խոսքով` իրենք նոր բնակարանում այդ օրը մաքրություն են արել, իսկ օրեր անց, երբ կրկին եկել են, չեն կարողացել բանալիով դուռը բացել: «Ասացի` բարգալկա բերենք, դուռը բացենք, բայց խորհուրդ չտվեցին»,- անկեղծանում է տուժողը և հավաստիացնում, որ եթե իմանար` ինչ պատմության մեջ է ընկնելու, չէր դիմի նման գործարքի:

Տուժողը դատարանին հայտնեց նաև, թե ինչպես է ծանոթացել գործով մեկ այլ տուժող  Սուրեն Ավագյանի հետ, ով իրեն ասել է. «Ոնց որ  իմ ու քո բնակարանը նույնն ա»:

Նախաքննության ընթացքում պարզվել է, որ Տոնոյանի գնած բնակարանը վաճառվել է մեկ ուրիշ գնորդի ևս, որի մասին, սակայն, տուժողը տեղյակ չէր: Տոնոյանը դատարանին հայտնեց նաև, որ բնակարանը գնելու համար միջնորդ հանդիսացած բրոքերին այդպես էլ հետո չի գտել, անունը մոռացել է, միայն հեռախոսահամարն ունի: Խաբված գնորդի միակ ցանկությունը բնակարանը ստանալն է: Նա  նոր բնակարան ստանալու քաղհայցով դիմել է դատարան:

Դեռեւս 253 տուժող պետք է հարցաքննվի: