Հրազդանյան ասֆալտի յուրահատկությունները

2013թ. նախագահական ընտրություններում իշխանությունների համար լավ աշխատած ՀՀԿ-ական քաղաքապետերն ու համայնքապետերը բարձրացել են իշխանությունների աչքին, եւ այդ հանգամանքը հաշվի առնելով`  տեղական ինքնակառավարման մարմինների որոշ ղեկավարներ արդեն հասցրել են պարզ ճակատով այցելել իրենց ղեկավարներին և խնդիրներ բարձրացնել:

Ընտրություններից հետո  իշխանությունները պետք է որ լավ նայեին նաև Սերժ Սարգսյանի օգտին ձայների զգալի քանակ ապահոված հրազդանցիներին: Բայց պատկերն այլ է: Քաղաքի ճանապարհներին առաջացած ջրափոսերին թիվ ու սահման չկա, ավելին` ջրափոսերն ամրապնդում են իրենց կայուն դիրքերը և սուպերմարկետների օրինակով ձգտում ավելի մեծանալ: Ի տարբերություն անբարեկարգ փողոցների համար պատասխանատուների, ջրափոսերի բախտը հարցում բերել է` վարորդները նրանց չեն հայհոյում:

Ինչևիցե, գարունը եկել է, ջրափոսերի թիվն ավելանում է` արձանագրելով մի «դրական» երևույթ` արտագաղթի հետևանքով հայհոյողների թիվը նվազել է:

Քաղաքի անմխիթար վիճակն այլեւս չհանդուրժող մարդիկ վերցրել են տեսախցիկն ու ստանձնել լրագրողի դերը: Yerkir.am-ը ներկայացնում է Հրազդանի բնակիչ Մեսրոպ Մեսրոպյանի պատրաստած տեսանյութը , որը պատմում է քաղաքի անբարեկարգ փողոցների, «նորագույն մեթոդներով» կատարված փոսալցման աշխատանքների և, ընդհանրապես,  հրազդանյան ասֆալտի յուրահատկությունների մասին: