Չենք միջամտելու. Առաքել Մովսիսյան

Նախագահի թեկնածու, ԱԻՄ կուսակցության նախագահ Պարույր Հայրիկյանի դեմ իրականացված մահափորձը, ԱԺ ՀՀԿ խմբակցության պատգամավոր Առաքել Մովսիսյանի կարծիքով, ուղղված էր մեր պետականության դեմ, երկրի կարգուկանոնը խարխլելու, երկրի իշխանությունների դեմ:

Yerkir.am-ի հետ զրույցում պատգամավորը հնարավոր համարեց, որ այս ամենի հետեւում կարող էին կանգնած լինել դրսի ուժեր: Չնայած նման կարծիքին եւ այն հանգամանքին, որ մահափորձի հաջորդ օրը Հայրիկյանը հայտարարում էր, որ միջադեպի հետեւում կանգնած է Ռուսաստանը, Առաքել Մովսիսյանը բացառեց, որ Ռուսաստանի մատը խառն է:

«Ռուսաստանը հաստատ նման բան չէր անի, որովհետեւ մեր պետության հետ հզոր պայմանավորվածությունների մեջ ենք գտնվում՝ սկսած բանակային հարցերից: Լավից լավ ենք Ռուսաստանի հետ: Այնտեղ բազմահազարանոց հայեր ունենք` Ռուսաստանում, իրենց լավ են զգում, դրա համար ես չեմ կարող կասկածել Ռուսաստանին»,- նշեց նա եւ եւս մեկ անգամ ընդգծեց, որ սա ուղղված էր մեր պետության, պետականության դեմ, քանի որ մեր պետությունն օր օրի կայանում է:

«Դատապարտում եմ հայ անձնավորության վրա զենք բարձրացնելը, սա է իմ վերջնական խոսքը»,- հայտարարեց ՀՀԿ-ական պատգամավորը:

Դիտարկմանը` հնարավո՞ր է` Արեւմուտքին է կասկածում, Մովսիսյանը պատասխանեց, որ «չի կարող կասկածամիտ լինել, միայն դատապարտում է»: Եթե կրակողը, պարզվի, հայ է եղել, ՀՀԿ-ական պատգամավորը նրան թուրք կհամարի: «Այս փոքրիկ երկրում հայը հայի վրա երբեւիցե իրավունք չունի զենքով խոսելու»,- շեշտեց  նա:

Ի դեպ, պատգամավորից հետաքրքրվեցինք նաեւ, թե ինչպես է գնահատում քարոզարշավի ընթացքում նախագահի թույլ տված մի քանի «սխալները»: Ի պատասխան` Առաքել Մովսիսյանը հայտարարեց, որ ԱՄՆ-ում է եղել, հեռուստացույց չի նայել, ո'չ լսել է, ո'չ` տեսել: Չնայած սրան` պատգամավորը վստահ է, որ քարոզարշավը նորմալ է անցնելու: «Բոլորը պատժվելու են, ով որ կուզի լինի, էս արդար եւ մաքուր ընտրությունները խարխլելու մեջ, պատժվելու են միանշանակ: Ով որ ուզել է ընտրություններին սեպ խրել որեւէ մեկս էլ չենք միջամտելու, որ հանկարծ նրան ազատեն կամ չգիտեմ ինչ, չենք օգնելու, որովհետեւ սա նորից մեր պետության վրա է ուղղված: Ազատ, արդար, մաքուր ընտրությունների ենք գնում, քանի տարի է` փորձում ենք էլ ավելի մաքուր ընտրությունների գնալ: Մեր երկրի արժանապատվությունը նաեւ այս ընտրություններից է կախված»,- հայտարարեց ՀՀԿ-ական պատգամավորը: