ՀՀԿ-ական կին պատգամավորներն` իրենց բարետեսության ու անփորձության մասին

Արդեն հայտնի է, որ ԵԽԽՎ-ն դեմ է քվեարկել «Քաղաքական բանտարկյալները Ադրբեջանում» զեկույցին, որում բավական կոշտ գնահատականներ են հնչեցվում Ադրբեջանում հետապնդումների կապակցությամբ: «Ժողովուրդ» օրաթերթն, անդրադառնալով դրան, գրել էր. «Ահա թե ինչ հետեւանքներ է ունենում, երբ իշխող նժդեհական կուսակցությունը ԵԽԽՎ պատվիրակությունում իր կողմից գործուղում է ոչ թե պրոֆեսիոնալ պատգամավորների, այլ ընդամենը բարետես, երիտասարդ ու անփորձ աղջնակների, ինչպիսիք Արփինե Հովհաննիսյանն ու Նաիրա Կարապետյանն են»:

Թերթի այս մեղադրանքին այսօր ԵԽԽՎ աշխատանքները ամփոփելու ժամանակ անդրադարձան հենց իրենք` Արփինե Հովհաննիսյանն ու Նաիրա Կարապետյանը:

Արփինե Հովհաննիսյանը, խոսելով փորձառությունից, նախ ընդգծեց, որ փորձառու չեն ծնվում` փորձառու դառնում են: «Ես փորձառությանը վերաբերվում եմ հարգանքով, բայց ոչ սրբազան սարսուռով: Փորձառու գործընկերներս կհավաստեն, որ փորձառությունն այս խնդրում կապ չուներ, քանի որ մեծ լոբբինգ է իրականացվել: Իսկ ինչ վերաբերում է բարետեսությունը, ասեմ, որ այն թերեւս կփրկի աշխարհը, եթե չարությունն եւ տգիտությունը այն չկործանեն»,- հայտարարեց նա:

Իր հերթին, Նաիրա Կարապետյանն էլ ընդգծեց, որ համաձայն է «բարետես գործընկերոջ» հետ եւ ավելացրեց, որ բարետեսությունը չի բացառում պրոֆեսիոնալիզմը: