Բագրատյանը ՀԱԿ-ին առաջարկ է անելու

Նախագահական ընտրություններից հետո Հրանտ Բագրատյանը մտադիր է ՀԱԿ-ում հարց բարձրացնել, թե հետո ինչ ձեւաչափով է շարունակելու ՀԱԿ-ն աշխատել: Եթե այդ փորձը չստացվի, ապա նա ակտիվորեն շարունակելու է «Ազատություն» կուսակցությունն ուժեղացնել: Այսօր իր մտադրությունների մասին լրագրողների հետ խոսեց նախագահի թեկնածուն:

Նա նշեց, որ ինքը հանրությանը ներկայացել է ծրագրով եւ կուզեր տեսնել բոլոր թեկնածուների ծրագրերը` իսկական ծրագրեր, այլ ոչ թե ցանկությունների շարադրանք: Որովհետեւ, ինչպես նշեց Բագրատյանը, բոլորը պարտավոր են ասել, թե ինչ են անելու նախագահ ընտրվելու դեպքում:

Երկրորդ փուլի հնարավորության մասին Բագրատյնը նշեց, որ իրեն թույլ չի տա անգամ Սերժ Սարգսյանի մասին սուտ ասել: Բայց եթե որեւէ մեկն իր հետ շրջաններ այցելի ու տեսնի այնտեղի ռեակցիան գործող նախագահի հանդեպ, ապա այլ կարծիք կկազմի: Իսկ դրանից հետո, եթե իշխանության թեկնածուն կարծում է, թե ընտրվելու է, ապա թող կարծի: