Թուրքերը սատարել են հայերին

Ասացիք` մեկ կրոն, մեկ լեզու, մեկ ազգ, սակայն արմատավորեցիք ատելության լեզուն: Թուրքական Today's Zaman պարբերականի հաղորդմամբ` նման հայտարարություն է արել «Խաղաղություն եւ ժողովրդավարություն» կուսակցության անդամ Սեբահաթ Թունջելին: Իսկ «ասացիք»-ն ուղղված է հենց երկրի վարչապետ Ռեջեփ Թայիփ Էրդողանին:

Թունջելին եւ բազմաթիվ թուրքեր այսօր Ստամբուլում խաղաղ երթ են կազմակերպել եւ իրենց բողոքի ձայնն են բարձրացրել Ստամբուլի հայաշատ Սամաթիա թաղամասում հայերի վրա կատարված հարձակումների դեմ: Ակցիային մասնակցել են նաեւ քուրդ պատգամավորներ, Թուրքիայի Ազգային մեծ ժողովի Մարդու իրավունքների ուսումնասիրման հանձնաժողովի անդամներ:

Հնչել են տարբեր վանկարկումներ`«Մենք հայերի կողքին ենք», «Թույլ չենք տա վնասել մեր եղբայրներին եւ քույրերին», «Չդիպչես իմ հարեւանին», «Ատելությունը` ձեզ, մարդկությունը` մեզ»: Երթի մասնակիցները նաեւ մեխակներ են դրել 2012 թվականի դեկտեմբերի վերջին սպանված տարեց հայ կնոջ` Մարիցա Քյուչուքի տան առջև:

Երթի մասնակիցներն իրենց ելույթներում ընդգծել են այն հանգամանքը, որ հարձակումները կատարվել են խտրականության հողի վրա: Նրանք կարեւորել են կատարվածը հետաքննելու անհրաժեշտությունը, բայց, միեւնույն ժամանակ, նշել, որ արդար հետաքննություն չեն սպասում: Մինչ օրս հայ կանանց վրա հարձակումներ իրականացնելու առնչությամբ ձերբակալվածներ չկան: