Իվանիշվիլին հրավիրված է ''ռուսական նախաճաշի''

Դավոսում անցկացվող Համաշխարհային տնտեսական ֆորումի ընթացքում Վրաստանի եւ ՌԴ վարչապետների հանդիպում չի ծրագրված: Այդ մասին, ըստ apnsy.ge-ի, հայտնել է ինքը` Բիձինա Իվանիշվիլին, սակայն միաժամանակ չի բացառել, որ նման հանդիպում կարող է «պատահաբար տեղի ունենալ»:

Վրաստանի վարչապետն ասել է, որ հունվարի 25-ին ինքը հրավիրված է նախաճաշի, որը Դավոսում կազմակերպում է ռուսական պատվիրակությունը: «Որքան տեղյակ եմ` նախաճաշի մասնակիցների ցուցակում վարչապետ Դմիտրի Մեդվեդեւը չկա: Սակայն եթե նման հանդիպում պատահաբար տեղի ունենա, դուք անպայման կիմանաք այդ մասին»,- ասել է նա լրագրողներին:

Իվանիշվիլին նշել է, որ նախաճաշը հիմնականում գործարար վերնախավի համար է, որի ներկայացուցիչներից շատերին ինքը ճանաչում է: «Ինձ հետաքրքրում են հնարավոր ներդրումները, այդ պատճառով ես կգնամ այդ միջոցառմանը»,- հայտարարել է նա: