Նոր հյուրանոցներ են կառուցվելու

Անցնող` 2012 թվականին 8.5 հազար փոքր ու միջին ձեռնարկատերերի էկոնոմիկայի նախարարությունը աջակցություն է ցուցաբերել. լրագրողների հետ հանդիպման ժամանակ այսօր հայտնեց էկոնոմիկայի նախարար Տիգրան Դավթյանը: Նա նշեց, որ ՓՄՁ դաշտում աջակցության ու ծրագրերի ծավալները գրեթե կրկնապատկվել են:

Նախարարը նաեւ կարեւորեց ՓՄՁ-ներդրումներ ՈւՎԿ-ի գործունեությունը, որով ավելի քան հինգ միլիարդ դրամ է տեղաբաշխվել:

«Բոլոր ծրագրերն էլ, իսկ դրանք գրեթե չորս տասնյակ են, հաջողությամբ են ընթանում: Այս ծրագրերը արտադրական ծրագրեր են: Եվ մեր հիմնական նպատակը ոչ թե շահույթ ստանալն է, այլ արտադրությունը, տնտեսությունը խթանելը»,- նշեց նախարարը:

Տիգրան Դավթյանի հաղորդմամբ` զբոսաշրջության ոլորտում տարեսկզբին որոշ խնդիրներ առաջացան` կապված Իրանից տուրիստական հոսքերի նվազման հետ, բայց տարվա վերջին էկոնոմիկայի նախարարությունն արձանագրել է մոտ 9.2 տոկոսի աճ:

Իսկ զբոսաշրջիկների ընդհանուր թիվն այս տարվա արդյունքներով կլինի մոտ 830 հազարի սահմաններում: Այս ոլորտում նախարարը կարեւորեց տրանսպորտի, ենթակառուցվածքների եւ, որ ամենակարեւորն է, հյուրանոցային համալիրների ձեւավորումը: Առաջիկայում նախատեսվում է եւս մի քանի նոր հյուրանոցների գործարկումը: