Պուտինի պահակախմբին սպառնացող հայը լքել է Ռուսաստանը

Ռուսաստանցի բնապահպան Սուրեն Գազարյանը հայտարարել է, որ լքում է ՌԴ-ն, քանի որ ինքը դաշնային հետախուզման մեջ է: Ըստ utro.ru-ի` այդ մասին հայտնել են Human Rights Watch միջազգային իրավապաշտպան կազմակեպության մամուլի ծառայությունից:

Ներկայումս Գազարյանը փորձում է ապաստան գտնել եվրոպական երկրներից մեկում: Ռուսաստանում նրան սպառնում է պատիժ ՔՕ 119-րդ հոդվածով` սպանության սպառնալիք:

Բնապահպանի հետապնդումը սկսվել է այն բանից հետո, երբ նա բախում է ունեցել Կրասնոդարի երկրամասում կառուցվող էլիտար առանձնատան պահակախմբի հետ: Ի դեպ, ասվում է, որ առանձնատունը պատկանում է ՌԴ նախագահ Պուտինին: Պահակախմբի անդամները սպառնացել են նրա, փորձել են խլել բջջային հեռախոսը: Ինքնապաշտպանության համար Սուրենը գետնից քար է վերցրել եւ զգուշացրել, որ եթե իրեն մոտենան, քարով կհարվածի: Իսկ ըստ հետաքննության նյութերի` Գազարյանը հանկարծ ի հայտ եկած անձնական հակակրանքի հետեւանքով «սպառնացել է սպանել պահակախմբի անդամ Պիրոգովին»:

Ավելի վաղ բնապահպանը դատապարտվել էր 3 տարի պայմանական բանտարկության Կրասնոդարի երկրամասի նահանգապետ Ալեքսանդր Տկաչովին պատկանող առանձնատանը վնաս հասցնելու համար: Գազարյանը առանձնատան դարպասներին գրել էր` «Սանյա` գող», «Դոդոշ», «Սա մեր անտառն է», «Սա մեր հողն է»: