Մոսկվայում ԱՄՆ դեսպանը հրաժարվել է լքել Ռուսաստանը

Մոսկվայում ԱՄՆ դեսպան Ջոն Սալիվանը հրաժարվել է հեռանալ Ռուսաստանից՝ չնայած խորհրդատվությունների համար Վաշինգտոն մեկնելու առաջարկին․ գրում է Axios-ը` վկայակոչելով աղբյուրներ:

Ըստ թերթի՝ Սալիվանը հավատարիմ է այն դիրքորոշմանը, որ ռուսական կողմը պետք է «ստիպի իրեն հեռանալ», եթե ցանկանում է, որ ինքը լքի Մոսկվան:

Ապրիլի 16-ին Ռուսաստանի արտգործնախարար Սերգեյ Լավրովը հայտարարեց, որ Կրեմլը խորհուրդ է տվել Մոսկվայում ԱՄՆ դեսպան Ջոն Սալիվանին`գնալ տուն` երկու երկրների միջև առկա հարաբերությունների վերաբերյալ խորհրդատվությունների համար: Նախարարի խոսքով՝ դիվանագետին նման առաջարկություն է արել նախագահի օգնական Յուրի Ուշակովը:

Ապրիլի 15-ին Սալիվանը կանչվել է Ռուսաստանի արտաքին գործերի նախարարություն՝ հակառուսական նոր սահմանափակումների պատճառով: Նախարարությունը նրան պատմել է Մոսկվայի մի շարք պատասխան գործողությունների մասին:

Դեսպանն իր հերթին ասել է, որ իր այցը տեղի է ունեցել ամերիկյան կողմի խնդրանքով: Նա հանդիպումը որակել է որպես «մասնագիտական և հարգալից»։