Կոտայքում ԲՀԿ-ականների մեծ մասը իրենց ձայնը կտան Սերժ Սարգսյանին. մարզպետ

ԱԺ-ում 2013թ. Բյուջեի նախագծի քննարկման ժամանակ Կոտայքի մարզպետ Կովալենկո Շահգալդյանը լրագրողների հետ զրույցում հայտարարել էր, որ իր ինտուիցիան հուշում է, որ ԲՀԿ նախագահ Գագիկ Ծառուկյանը չի առաջադրվի առաջիկա նախագահական ընտրություններում: Yerkir.am-ի հետ զրույցում Կոտայքի մարզպետը հիշեցրեց մեզ հետ ունեցած այդ զրույցը:

Մեր այն դիտարկմանը՝ միայն ինտուիցիայի՞ հարց էր, թե տեղեկությունների էր տիրապետում, Կոտայքի մարզպետը հպարտորեն նշեց. «Միայն իմ ինտուիցիան, որը երբեք չի սխալվում»:

Գագիկ Ծառուկյանի քայլը Կոտայքի մարզպետը շատ ճիշտ է գնահատում:

«Կարծում եմ ինքը ողջախոհ քայլ կատարեց, արդեն կայացած քաղաքական գործիչ է եւ հենց այնպես չէր կարող այդ որոշումը կայացնել: Կարծում եմ՝ Ծառուկյանն այդ որոշումը կայացրել է քննարկումների, կանխատեսումների արդյունքում եւ եկել այդ եզրակացության, որը շատ ճիշտ եմ համարում»:

Կոտայքի մարզպետը բացառում է, որ Ծառուկյանի վրա ճնշումներ են գործադրել: «Բացառված է, որ նման բան եղած լինի: Նախ, երկրի նախագահն այդպիսի ոճ չունի, բացի դա էլ Ծառուկյանն այն մարդը չէ, որին ճնշումների ենթարկեն»,-հայտարարեց Կովալենկո Շահգալդյանը:

Դիտարկմանը, որ երբ արդեն պարզ է, որ Ծառուկյանը չի առաջադրվելու, կարող ենք փաստել, որ ընտրությունները ՀՀԿ-ի համար հեշտ են անցնելու, հաղթանակն էլ անհամեմատ մոտ է թվում, Կոտայքի մարզպետն արձագանքեց. «Հաղթանակը երբեք հեշտ չի տրվում, համեմատաբար, իհարկե, դյուրին կլինի հիմա: Բայց պետք է հաշվի առնենք, որ կա ընդդիմադիր ընտրազանգված, որը ձայները կտա այլ թեկնածուի»:

Կոտայքի մարզպետը չգիտի, թե ԲՀԿ-ի ընտրազանգվածը ում կտա իր ձայնը, բայց մի բանում վստահ է. «Մի մասը հաստատ կտա մեր թեկնածուին, մնացածը՝ չգիտեմ: Կոտայքում ԲՀԿ-ականների մեծ մասը իրենց ձայնը կտան մեր թեկնածուին»: