Թրաֆիկինգի դեմ պայքարի նոր ձեռնարկ

Իրավապահ մարմինների համար թրաֆիկինգի դեմ պայքարի դասընթացների ձեռնարկ է  հրատարակվել:

Ձեռնարկը պատրաստվել է փորձագիտական թիմի կողմից` տարածաշրջանային բազմամյա ծրագրի շրջանակներում, ԵԱՀԿ-ի աջակցությամբ: Այն նախատեսված է իրավապահ մարմիններին, դատախազներին, ոստիկաններին, դատավորներին, սահմանապահներին եւ աշխատանքային տեսուչներին ուսուցանողների համար:

«Հպարտությամբ կարող եմ նշել, որ Հայաստանում թրաֆիկինգի դեմ պայքարում որոշակի հաջողություններ ունենք: Այս ձեռնարկը կլինի լավագույն ուղեցույցը, եւ տարիների կուտակած մեր փորձը կփոխանցենք հաջորդ սերնդին»,- ասաց ՀՀ ոստիկանության պետի տեղակալ Արթուր Օսիկյանը:

Ձեռնարկում ներկայացված մեթոդաբանությունն արդեն փորձարկվել է գործնական դասընթացների ժամանակ: «Այս մեթոդաբանությունն ավելի համակարգված կդարձնի Հայաստանի իրավապահ մարմինների աշխատանքը թրաֆիկինգի դեմ պայքարի ոլորտում»,- ասաց ԵԱՀԿ երեւանյան գրասենյակի ղեկավարի տեղակալ Քարել Հովսթրան:

Ըստ ԱՄԿ հակաթրաֆիկինգային տարածաշրջանային ծրագրի ազգային համակարգող Նվեր Սարգսյանի` այս ձեռնարկը կարող է նպաստել իրավապահ մարմինների եւ ՀՀ աշխատանքի պետական տեսչության համագործակցությանը: Ձեռնարկում տեսականը համատեղել են գործնականի հետ: