Ընտրվելու իրավունք` արաբ կանանց

Սաուդիան Արաբիայի թագավորը պատմական որոշում է ընդունել. այսուհետ այս երկրի կանայք ընտրելու եւ ընտրվելու իրավունք ունեն:

Թագավորական ընտանիքի անդամների կողմից կառավարվող այս երկրում կանայք կարող են թագավորի կողմից նշանակվող 150 հոգանոց խորհրդի անդամներ դառնալ, ինչպես նաեւ ընտրվել տեղական ընտրություններում:

«Սակայն նրանք պետք է համապատասխանեն իսլամի կանոններին»,- հայտարարել է թագավորը` առանց մանրամասնելու, թե կոնկրետ ինչ նկատի ունի:

Ըստ CNN-ի` նոր օրենքը ուժի մեջ է մտնելու միայն 2015 թվականին: Փաստորեն, այս հինգշաբթի օրը կայանալիք ընտրություններին մասնակցելու հնարավորություն կանայք չեն ունենա:

ՏԻՄ ընտրությունները Սաուդյան Արաբիայում անցկացվող միակ ընտրությունն է: Սաուդիան Արաբիայի ակտիվիստները երկար տարիներ պայքարել են կանանց` ընտրության իրավունքի համար, սակայն այս երկրում կանանց հանդեպ խտրականություն կա բոլոր ոլորտներում, օրինակ` նրանք առանց տղամարդու  թույտվության իրավունք չունեն տնից դուրս գալու, չեն կարող մեքենա վարել, ճանապարհորդել, անգամ` վիրահատվել: