ԱՄՆ Հայ Դատի հանձնախումբը հետամուտ է վրացահայության խնդիրներին (լուսանկարներ)

ՀՅԴ Ամերիկայի ՀՅԴ Հայ Դատի հանձնախմբի ատենապետ Քեն Խաչիկյանը հանդիպումներ է ունեցել Վրաստանի բարձրաստիճան ղեկավարության եւ հայ համայնքի ներկայացուցիչների հետ, քննարկել վրացահայերի համայնքային, սոցիալ-տնտեսական, հոգեւոր եւ մշակութային կյանքին վերաբերող հարցեր:

«Այս ճամփորդությունը հրաշալի հնարավորություն ընձեռեց մեզ` ավելի լավ ճանաչելու Ջավախքում եւ Թբիլիսիում ապրող հայերի խնդիրները: Մոտակա ամիսներին մենք կհամագործակցենք ԱՄՆ կոնգրեսականների հետ եւ ուղիներ կփնտրենք` վրացահայերի կյանքն ավելի բարեկեցիկ դարձնելու ուղղությամբ»,- ասել է հանձնախմբի ատենապետը:

Մեկ շաբաթ տեւած այցի ժամանակ Քեն Խաչիկյանին ուղեկցել է Հայ Դատի վաշինգտոնյան գրասենյակի մամուլի խոսնակ Էլիզաբեթ Չուլջյանը: Նրանք հանդիպումներ են ունեցել Վրաստանի արտաքին գործերի, մշակույթի, կրթության, արդարադատության, տարածքային ինքնակառավարման եւ ազգային անվտանգության նախարարների հետ: Հայ համայնքին վերաբերող հարցեր են քննարկվել նաեւ Վրաստանում ԱՄՆ դեսպան Ջոն Բասի հետ: