Հայաստանին մաղթում է կոնֆլիկտների կարգավորում

ՀՀ անկախության 20-ամյակի կապակցությամբ Գերմանիայի արտակարգ եւ լիազոր դեսպան Հանս-Յոխեն Շմիդտը Հայաստանին մաղթում է ուղիներ գտնել հայ-թուրքական հարաբերությունների եւ ԼՂ հիմնախնդրի խաղաղ լուծման համար: «Ես կարծում եմ, որ Կովկասի երկրների համար շատ կարեւոր է ԼՂ խնդրի եւ հայ-թուրքական գործընթացի կարգավորումները, որոնք տարածաշրջանում խաղաղություն կհաստատեն»,- ասաց նա:

ԼՂ հիմնահարցում Գերմանիայի պաշտոնական դիրքորոշումը հետեւյալն է.  Գերմանիան աջակցում է ԵԱՀԿ ՄԽ ջանքերին` ուղղված խնդրի խաղաղ կարգավորմանը եւ ցանկանում է տարածաշրջանը տեսնել առանց հակամարտությունների:

Շմիդտն անդրադարձավ նաեւ Հայաստանի եւ ԵՄ երկրների միջեւ վիզային ռեժիմի հեշտացմանը. «Հարցը քննարկվելու է Վարշավայում կայանալիք ԵՄ Արեւելյան գործընկերների գագաթաժողովում, ինչին ես մեծ կարեւորություն եմ տալիս: Եվ եթե մենք շահագրգիռ ենք ԵՄ երկրների եւ կովկասյան տարածաշրջանի միջեւ հարաբերությունների հաստատման հարցում, պետք է հնարավորություն ստեղծենք մարդկանց ազատ տեղաշարժվելու համար»:

Նա ասաց, որ ԵՄ-ն հետաքրքրվում է նաեւ տարածաշրջանի տնտեսական զարգացման խնդիրներով, դա կապահովի նոր աշխատատեղեր եւ կկանխի արտագաղթը:

Դեսպանը նշեց նաեւ, որ ԵՄ անդամ պետությունների ներկայացուցիչները մեծ ուշադրությամբ հետեւելու են հաջորդ տարի Հայաստանում կայանալիք խորհրդարանական ընտրությունների անցկացմանը: