Գերօպերատիվ լինելն էլ մի բան չէ

Այսօր հայաստանյան լրատվամիջոցները ոչ թե օպերատիվ, այլ երբեմն նույնիսկ գերօպերատիվ են, ինչը որոշ դեպքերում դրական համարել չի կարելի: Օրինակ` հաճախ հենց դրա հետեւանքով էլ ադրբեջանական եւ թուրքական կողմի ապատեղեկատվությունը շատ արագ ներթափանցում է նաեւ տեղի լրատվամիջոցների լրահոսն ու տարածվում:

Այսօր լրագրողների հետ հանդիպման ժամանակ տեղեկատվական անվտանգության փորձագետ Սամվել Մարտիրոսյանն ասաց, որ խնդիր է նաեւ այն, որ հայկական լրատվական դաշտում քիչ մասնագետներ կան, որոնք տարրական պատկերացում ունեն թուրքական եւ ադրբեջանական լրատվամիջոցների մասին. այսինքն` թե դրանցից որոնք են դեղին մամուլ, որոնք են հեղինակավոր եւ հարգված, որոնք են հայտնի` ապատեղեկատվություն տարածելու առումով, որոնք ինչ քաղաքական դիրքորոշումներ ունեն:

Փորձագետը նշեց նաեւ, որ հաճախ հայկական աղբյուրները հղումներ են անում այնպիսի կայքերի, որոնք կեղծ «հայկական» են:

«Ադրբեջանցիները կես տարին մեկ ստեղծում են կեղծ հայկական կայք: Օրինակ` այսօրվա դրությամբ կա armenianreport.com կայքը, որի վրա հաճախ հղումներ են արվում: Շուտով ավելի ագրեսիվ կսկսի աշխատել նաեւ proarmenia.info կայքը»,- ասաց Ս. Մարտիրոսյանը: