ԵՄ-ն արգելում է սիրիական նավթի ներմուծումը

Եվրամիության 27 անդամ երկրների ներկայացուցիչները երեկ Բրյուսելում քաղաքական համաձայնության են եկել ԵՄ ներմուծվող սիրիական նավթի էմբարգոյի հարցում. հայտարարել է ԵՄ արտաքին քաղաքականության հարցերով գերագույն հանձնակատար Քեթրին Էշթոնը:

Հաջորդ շաբաթ ԵՄ խորհուրդը պետք է հավանություն տա այդ, նաեւ այլ պատժամիջոցների` սիրիացի մի շարք պաշտոնյաների, ընկերությունների նկատմամբ, նաեւ Եվրոպական ներդրումային բանկի գծով Սիրիային տրամադրվող տեխնիկական օգնությունը սառեցնելու վերաբերյալ:

Սիրիացի պաշտոնյաների ցուցակում, որոնց մուտքը ԵՄ արգելված է, եւ որոնց բանկային ակտիվները Եվրոպայում սառեցված են, արդեն 35 անուն կա: «Սեւ ցուցակում» են Սիրիայի ուժային կառույցների հետ համագործակցող 4 սիրիական ընկերություններ: Եվրամիությունը նաեւ արգելք է դրել Սիրիային զենք մատակարարելու վրա եւ դադարեցրել է երկկողմ համագործակցության վերաբերյալ համաձայնագիրը: