Ինտերնետ` ահաբեկչային նպատակների համար

Ահաբեկչական կազմակերպություններն ավելի հաճախ են սկսել կիրառել ժամանակակից օնլայն հաղորդակցուղիները ահաբեկչությունների կազմակերպման ժամանակ. ասվում է ԱՄՆ պետդեպարտամենտի` աշխարհում ահաբեկչական սպառնալիքի մակարդակի վերաբերյալ զեկույցում:

Փաստաթուղթը, որը կազմվել է 2010 թվականի արդյունքներով, հրապարակվել է պետդեպարտամենտի պաշտոնական կայքէջում:

«Մտահոգություն է առաջացնում այն, որ գրոհայիններն ավելի հաճախ են օգտվում օնլայն միջոցներից, օրինակ` ֆորումներից, տեսանյութերի փոխանցման սերվերներից: Դրանց միջոցով բռնությունների, նաեւ առանձին գործողությունների կոչեր են արվում: Օնլայն հանրության բազմաթիվ անդամները իրական կյանքում էլ արմատականություն սերմանող եւ բռնությունների հրահրող ծայրահեղականների հետ ուղղակիորեն շփվելու հնարավորություն ունեն»,- նշված է զեկույցում:

Որպես օրինակ` բերվում է մի դեպք, երբ պակիստանյան ծագումով 5 ամերիկացիներ երկար ժամանակ YouTube-ի միջոցով «Թալիբանի» համար ԱՄՆ-ում պոտենցիալ ահաբեկիչներ հավաքագրելու հանձնարարականներ են ստացել: Արդյունքում` նրանց հաջողվել է նախկինում նույնպես պակիստանցի մի երիտասարդի համոզել մեկնել Պակիստան եւ պատրաստություն անցել ԱՄՆ-ի դեմ պայքարելու համար:

Զեկույցում նշվում է, որ «Ալ Քաիդա»-ն եւ դրա մասնաճյուղերը շարունակում են մնալ ԱՄՆ-ի հիմնական ահաբեկչական սպառնալիքը: