HTC-ն դատի է տվել Apple-ին

Սմարթֆոններ արտադրող թայվանական HTC ընկերությունը ԱՄՆ-ում դատի է տվել Apple-ին` մրցակցային արտոնությունները չարաշահելու համար:

HTC-ն ներկայումս պայքարում է  iPhone-ները, iPad-ները, iPod-ները եւ Mac համակարգիչները ԱՄՆ ներկրելու դեմ:

Ինչպես հաղորդում է BBC-ն, դատարան դիմելը վերջին քայլն է երկու ընկերությունների միջեւ մղվող «պատերազմում»: Այս երկուսի միջեւ պայքարն ավելի է թեժացել այն բանից հետո, երբ անցյալ շաբաթ Google-ը համաձայնություն է ձեռք բերել հեռախոսներ արտադրող Motorola ընկերությունը 12.5 միլիարդ դոլարով գնելու վերաբերյալ: Google-ը ցանկանում է զարգացնել իր սմարթֆոնների համար նախատեսված Android օպերացիոն համակարգը եւ դարձնել նույնքան մրցունակ, որքան Microsoft-ն է:

«Apple-ի դեմ այս քայլին մենք գնում ենք` պաշտպանելով մեր ինտելեկտուալ սեփականությունը, մեզ հետ համագործակցող արտադրող ընկերություններին եւ, որ ավելի կարեւոր է, մեր սպառողներին, ովքեր օգտագործում են HTC արտադրանքը»,- ասել է HTC գլխավոր քարտուղար Գրեյս Լեյը:

Իսկ Apple-ը դեռեւս որեւէ հայտարարություն չի արել այս կապակցությամբ: