Թուրքն աշխարհի ամենացեղասպան ազգերից է. Բրեյվիկ

Նորվեգական Ուտոյա կղզու երիտասարդական ճամբարում սպանդ կազմակերպած եւ մայրաքաղաք Օսլոյում կառավարության շենքի մոտ պայթուն իրականացրած Անդերս Բերինգ Բրեյվիկը հակաիսլամական եւ իսրայելամետ հայացքների ջատագով է: Այդ մասին նա գրել է իր 1500 էջանոց մանիֆեստում, որը ահաբեկչական գործողություններից առաջ տեղադրել է ինտերնետում:

Բրեյվիկը ներկայացնում է իր աշխարհայացքը` ծայրահեղական արտահայտություններով, երկարաշունչ իսլամաֆոբ մեջբերումներով, ծայրահեղ աջ սիոնիստական հայացքներով:

Նա մեղադրում է արեւմտյան ԶԼՄ-ներին, որոնք «անհիմն մեղադրանքներ են տեղում» իսրայելական օրինազանցությունների կապակցությամբ`անտեսելով մահմեդական լուրջ հարձակումները:

«2083-Անկախության եվրոպական հռչակագիր» կոչվող մանիֆեստում ասվում է. «Ինչպես բոլորս գիտենք, Եվրոպայում հիմնախնդիրների արմատը մշակութային վստահության (ազգայնականության) բացակայությունն է: Ազգայնական դոկտրինի նկատմամբ այդ իռացիոնալ վախը խանգարում է մեզ կանգնեցնել սեփական ազգայնական-մշակութային ինքնասպանությունը, մինչդեռ իսլամական գաղութացումն ամեն տարի ընդլայնվում է...»:

Բրեյվիկը, սակայն, նշում է, որ ինքը չի ատում մահմեդականներին, եւ գրում է, որ տարիներ շարունակ մահմեդական ընկերներ է ունեցել, որոնցից մի քանիսին մինչ օրս հարգում է, սակայն «զզվում է» Նորվեգիայի կառավարությունից, որը Նոբելյան մրցանակ է շնորհել իսլամական ահաբեկչին. նկատի ունի Յասիր Արաֆաթին:

Իր մանիֆեստում Բրեյվիկը մանրամասն (մոտ 9 էջում) անդրադարձել է նաև Օսմանյան կայսրությունում Հայոց ցեղասպանությանը, ներկայիս Թուրքիայի վարած խտրական քաղաքականությանը:

«Պատմության ընթացքում թուրքերը միլիոնավոր քրիստոնյաների են կոտորել, հարյուրհազարավորների` բռնի իսլամացրել: Թուրքն աշխարհի ամենացեղասպան ազգերից է` ցեղասպանություն է իրականացրել հայ, հույն և ասորի ժողովուրդների նկատմամբ»,- գրում է նա` պահանջելով այդ ժողովուրդներին վերադարձնել նրանց պատմական հայրենիքը:

«Այսպես կոչված Հյուսիսային Կիպրոսի Թուրքական Հանրապետության տարածքը պետք է վերադարձվի Կիպրոսի հույներին, Արևելյան Անատոլիա կոչվածը՝ Հայաստանին, Արևմտյան Անատոլիան՝ Հունաստանին»,- նշում է նորվեգացին։

Իսկ մանիֆեստի վերջում իր հանձարարականներն է տալիս իսլամի, մարքսիզմի եւ մուլտիկուլտուրալիզմի դեմ պայքարում. «Եթե որոշել եք հարվածել, ապա ավելի լավ է սպանել չափազանց շատ, քան ոչ բավարար, հակառակ դեպքում դուք նվազեցնում եք հարվածի ցանկալի գաղափարական ազդեցությունը: Բացատրեք, թե դուք ինչ եք արել եւ համոզվեք, որ բոլորը հասկանում են, որ մենք` Եվրոպայի ազատ ժողովուրդներս, պատրաստ ենք նորից ու նորից հարված հասցնել»: