Կրճատումներ չեն լինելու

Այսօրվա դրությամբ` Երեւանի պետական համալսարանն ունի 1000-ից քիչ ավելի դիմորդ` ի տարբերություն 2010-ի 4877 դիմորդների: Սակայն ԵՊՀ ռեկտոր Արամ Սիմոնյանը վստահեցնում է, որ լայնամասշտաբ կրճատումներ չեն լինի:

«Հնարավոր է լինեն հաստիքների կրճատումներ, բայց ոչ դասախոսական կազմի: Այս տարի քիմիայի, ռադիոֆիզիկայի, էներգետիկայի, մեխանիկայի բաժիններում առաջին կուրս չի լինի, փոխարենը պատմության բաժինը միակն է, որտեղ ընդունվելու համար մրցույթ է հայտարարված»,- լրագրողների հետ հանդիպման ժամանակ ասաց ռեկտորը:

Ըստ նրա` ԵՊՀ-ն համագործակցում է հանրապետության 6 դպրոցի հետ, քանի որ «առանց միջնակարգ դպրոցի գործերը լավ գնալու, դժվար թե հասարակությունն իրեն վերապահված գործառույթները կատարի»:

«Նախ կօգնենք դպրոցներին գրականությամբ, խորհրդատվությամբ, կաջակցենք ուսուցիչների վերապատրաստման գործընթացին: Հարկ եղած դեպքում աշակերտներն ու ուսուցիչները կարող են օգտվել մեր լաբորատորիաներից»,- ասաց Ա.Սիմոնյանը:

ԵՊՀ ռեկտորը ԿԳ նախարարին է ներկայացրել ծրագիր, ըստ որի` ավագ դպրոցում հասարակագիտական որոշ առարկաներ պետք է դասավանդեն համալսարանների մասնագետները, արդյունքում` աշակերտը, համապատասխան կրեդիտներ հավաքելու դեպքում, համալսարանի առաջին կուրսում այլեւս չի անցնի այդ առարկաները: