Կրճատումներ` դպրոցներում. նախարարը ներկայացնում է պատճառը

ՀՀ ԿԳ նախարար Արմեն Աշոտյանը պարզաբանում է, թե դպրոցներում ընթացող կրճատումների պատճառը որն է:

«Խոսակցություններ են տարածվում, որ դպրոցներում գնում են կրճատումներ: Հնչեցվում են նաև աստղաբաշխական թվեր' մինչև 10 000 մարդ: 

Եվ այսպես, ո՞րն է իրականությունը:

2014 թ. պետական բյուջեով, ի համեմատ 2013 -ի, նախատեսված են ֆինանսավորման ենթակա հետևյալ դրույքները'

մանկավարժներ' 
2013-ին' 25 116 դրույք,
2014-ին' 24 578 դրույք,

հաշվապահներ'
2013-ին' 1 232 դրույք,
2014-ին' 1 159 դրույք,

ուսումնաօժանդակ և տնտեսական անձնակազմ'
2013ին' 9 983 դրույք,
2014-ին' 12 747 դրույք,

վարչական անձնակազմ'
2013-ին' 3 812 դրույք,
2014-ին' 2 765 դրույք,

Ընդամենը' 2013-ին'40 143 դրույք, 
2014-ին'41 249 դրույք:

Այսինքն, 2014թ. պետական բյուջեով հանրակրթական դպրոցներում պետության կողմից ֆինանսավորվող դրույքների թիվը ոչ միայն չի նվազել, այլև աճել է 1000-ից ավել ուսումնաօժանդակ և տնտեսական անձնակազմի հաշվին: 

Միաժամանակ, իրականում մի շարք դպրոցներում 2014-ին իրականացվում են որոշ կրճատումներ:

Գաղտնիք չէ, որ Հայաստանի հանրակրթական համակարգում աշակերտական համակազմի տատանումներ են արձանագրվում: 

Սակայն մեզ դեռևս հաջողվում է խուսափել մանկավարժների լայնածավալ կրճատումներից, չնայած այն հանգամանքին, որ իմ կողմից արդեն մեջբերված տվյալներով 24 578 ուսուցչական դրույքների վրա իրականում աշխատում է մոտ 40 000 մանկավարժ, այսնիքն' շուրջ 15 000 ավել:

Այս անհամապատասխանությունն է հիմնական պատճառը, որ ուսուցիչների մի մասը, չունենալով լիարժեք ու ամբողջական ծանրաբեռնվածություն, աշխատելով կիսատ դրույքներով, չի ստանում ամբողջական, պետական բյուջեով նախատեսված աշխատավարձ: 

Դպրոցները ու մենք կանգնած ենք լուրջ ընտրության առջև' կամ պահել ամբողջական դրույքով աշխատող ուսոցիչներ, կրճատելով մնացածին, կամ կիսել դասաժամերը և պահել ավել ուսուցիչներ, որոնք աշխատում են ոչ լիարժեք ծանրաբեռնվածությամբ և փոքր աշխատավարձով: 

Ու դպրոցներն իրենք են ընտրում, թե ինչ ճանապարհով գնալ: 

Իդեպ, այս հարցը անմիջական կապ ունի նաև դասավանդման որակի, մանկավարժական կադրերի երիտասարդացման և հանրակրթության ոլորտի այլ բազում հարցերի հետ»:

Նախարարի պարզաբանման վերջաբանը` շուտով: