Ինչո՞ւ գրանդները ոչ մի թվի առաջ կանգ չեն առնում

Այն մարդիկ, ովքեր հետևում են ամառային տրանսֆերային պատուհանի զարգացումներին, հավանաբար զարմացած են, քանի որ ոչ մի գրանդ ոչ մի աստղաբաշխական գումարի առաջ կանգ չի առնում:

Ի՞նչն է պատճառը:

Հավանաբար եվրոպական ակումբներն արդեն տեղեկացել են, որ ՈՒԵՖԱ-ն, Միշել Պլատինիի գլխավորությամբ, եկող տարվանից որոշել է կիրառել մի օրենք, որը թույլ չի տա ակումբներին իրենց վաստկածից շատ ծախսել: Այսինքն` եթե, օրինակ, անգլիական «Մանչեսթեր Յունայթեդը» տարեկան վաստակում է 150 մլն եվրո, ուրեմն մանխունիացիները պետք է եկող տարվա իրենց տրանսֆերային գաղափարներն իրականություն դարձնեն այդ գումարի սահմաններում:

Կասեք` ի՞նչ վատ է` մի ամբողջ 150 միլիոն տրանսֆերների համար, սակայն եթե թիմը վաստակում է այդքան, դա չի նշանակում, որ տարեկան վաստակած գումարը ամբողջովին ծախսվում է նոր խաղացողների վրա:

Պարզ է, որ բոլոր եվրոպական ակումբները  նոր ֆուտբոլիստներ են գնում իրենց սեփականատերերի հաշվին: Օրինակը կրկին մառախլապատ Ալբիոնից. «Մանչեսթեր Սիթին», որը տարեկան վաստակում է 30 մլն-ից ոչ ավելի, իրեն թույլ է տալիս տրանսֆերների համար նախատեսել մինչև 200 մլն ֆունտ ստերլինգ:

Եթե որևէ մեկը չգիտի, ապա ասեմ, որ մանչեսթերյան ակումբի բաժնետոմսերի 70 տոկոսից ավելին պատկանում է շեյխ Մանսուրին, իսկ շեյխերի ֆինանսական կարողությունների մասին ավելորդ է խոսել...   

Ահա այս ամենի վերջն է որոշել տալ Միշել Պլատինին: Նախկինում հանրահայտ ֆուտբոլիստը ցանկանում է ֆուտբոլ ներմուծել ֆինանսական Fair Play տերմինը, այն է` եվրոպական թիմերը պետք է հարգեն միմյանց:

Այս օրենքի մասին լսելով` բոլորը խառնվել են իրար և ցանկանում են իրենց մոտակա տարիների ծրագրերն իրականություն դարձնել արդեն այս ամառ:

«Լիվերպուլն» առանց ափսոսելու 16 մլն ֆունտ ստերլինգով գնեց 20-ամյա Ջորդան Հենդերսոնին և դեռ պատրաստվում է նմանատիպ գումարներ ծախսել մոտակա 2 ամիսների ընթացքում: Մերսիսայդյան ակումբը, հիմնականում շեշտը դնելով երիտասարդների վրա, փորձում է փակել մոտակա հինգ տարիների տրանսֆերային պլանները:

Իսպանական «Ռեալ» Մադրիդը, որը վերջին տասնամյակում ծախսել է բոլորից շատ, և որի համար երբեք կարևոր չի եղել ֆուտբոլիստի տարիքը, այս տարի, չգիտես ինչու, որոշել է գնել հիմնականում երիտասարդներին: Ո՞վ էր լսել, որ արքայական ակումբը 10 մլն եվրո վճարի 19-ամյա պաշտպանի համար (այդքան կազմեց Ռաֆայել Վարանեի տեղափոխությունը), կամ` 30 մլն 23-ամյա Կոենտրաուի համար:

Բոլոր թիմերի տրանսֆերային նկրտումները գլխիվայր շուռ են եկել. եթե ժամանակին թիմերի սկաուտները  ֆուտբոլիստներին գնելու համար առաջին հերթին կարևորում էին փորձը, ապա այժմ առաջին տեղում է ֆուտբոլիստի տարիքը:

Կարելի է ասել, որ բոլորս անկախ մեր կամքից ներկա ենք լինում պատմական իրադարձության. ֆուտբոլը գնալով ավելի է երիտասարդանում, այսինքն` հիմա կաշվե գնդակի լավագույն վարպետներից շատերի տարիքը չի գերազանցում 25-ը:   

Դեռ հուլիս ամիսն է, և արդեն այսպիսի գումարներ են ծախսվում, իսկ տրանսֆերային ամենաթեժ ամիսը համարվում է օգոստոսը:

Շարունակեք հետևել տրանսֆերային զարգացումներին...

Ռազմիկ Հովհաննիսյան